Facebookimi nanisiaq
Arfineq marlunnik ukiullit imaanut aamma pissittalerput
Facebookimi nanisiaasumi imaanut aqqarnermik imalimmi pisut kingulliit politiit ernumaammissutigaat
Meeqqat arfineq marlunnik ukiulli allallu ukioqqortunerulaartut ataasinngornermi ualilluinnaraa Nuutoqqami imaanut pissipput. Inuit imminnut Facebookimi unammilleqataannerani pisut kingulliit taamaapput imaanut aqqarnissamut sapersinniuteqattaarluni unammisoqarmat.
Atuaruk: Nakorsaq: Nillertumi nalutsiarneq uloriananngilaq
Politiit inassutigaat meeqqat tamarmik imaanut nillertumut aqqanngilluinnassasut.
Takuuk: Video: Nick aamma inuppassuit allat immanut pissittut
Facebookimi nanisiaasoq imaani inittunertut Nunatsinni aamma siaruaappoq inuit imaani aqqarnissamut sapersinniuteqattaarmata. Ajorsartut immiaaqqanik karsillertussanngortinneqartarput. Nanisiaasoq taanna aamma meeqqat akornanni atugaalerpoq naak immiaarannanniunneq uani pineqanngikkaluartoq. Meeqqalli sapersinniuteqattaannerat taanna inuunermik navialisitsinermik kinguneqarsinnaasoq politiit isumaqarput.
Atuaruk: Facebookikkut unammisaqattaarut politiit sakkortuumik mianersoqqussutigaat
Ulorianarluinnarpoq
- Politiit biiliinik alapernaarsuisut ataasinngornermi ualikkut Nuutoqqamiipput. Meeqqat arfineq marlunnik ukiullit ilaallu ukioqqortunerulaartut imminnut sapersitsaallutik imaanut pississimapput. Taama pisoqarnera ernumaammernartutut isigaarput taamaammat meeqqat tamarmik imaanut aqqanngilluinnarnissaat inassutigaarput taanna inuunermik navialisitsinermik kinguneqarsinnaammat, Nuup politiivini pigaartuusoq Sermitsiaq.AG-mut oqarpoq.
Nuummi avanneqattaarnerani sila pueqqorteqqavoq issisiut 0-lup nalaaniiginnarluni ullunilu tulliuttuni taamaaginnarnissaa ilimasaarutaalluni. Illoqarfiit allat aamma kiannerungaanngillat.
- Ulorianarluinnartumik pisoqarsinnaavoq meeqqat nalunneq ilikkarluarsimanngippata imaluunniit nalunneq suli ilikkarsimanngippata. Imaanut nilleqisumut pinermi paatsiveeruttoqarsinnaavoq inuunermik ulorianartorsiortitsinermik kinguneqartumik. Taamaammat meeqqat tamaasa kaammattorumavagut imaanut nillertumut pisseqqunagit, Margrethe Kleist oqarpoq.
Politimestereqarfimmi unnerluussisuuneq Morten Nielsen Sermitsiaq.AG-mut ataasinngornermi ilisimatitsivoq inuit nammineq piumassutsimik imaanut pissereersut annaanniarneqassappata annaassiniarnermi aningaasartuutit ikiorneqartumut akiligassanngortitsissutigineqarsinnaasut.
Dronning Ingridep napparsimmavissuani nakorsat qullersaat Jesper Olesen oqarpoq imaani nillertumi nalunnguarneq immini ulorianartuunngitsoq ukiukkut nalunnguartarneq atugaareermat. Taamaattoq inuit imaanut nillertumut pissinniartut sillimaniarnikkut piareersimalluarnissaannik kaammattorpai.