Arctic Winther Games: Bibi Chemnitzip timersortartut 169-t atisalersussavai
Ukioq manna Arctic Winter Games Canadami South Slavemi ingerlanneqalerpat, timersortartut qanoq ittunik atisaqassanersut, Kalaallit Nunaanni Timersoqatigiit Kattuffiata oqaluttuareqqammerpaa.
Atisanik ilusilersuisartoq Bibi Chemnitz jakkinik, natsanik, tujuulunik, qungasequtinillu aappaluttumik qaqortunillu
– Erfalasutta assiganik – qalipaasersukkanik ilusilersuisuuvoq.
Allaqqasoqassanngitsut
“Kusanartorujussuupput, suminngaanneernerallu paattuungassaassanngilaq. Taamaattorli kavaajap tunuani Greenland allaqqassanngilaq. Air Greenland pingaarnertut aningaasaliisuunera atorluarlugu suliffeqarfittut ilisarnaataa ersersinneqassaaq, taamatullu Kalaallit Nunaaninngaanneernerput ersersersinneqassaaq, Kalaallit Nunaanni Timersoqatigiit Kattuffiat tusagassiuutinut nalunaarummi allappoq.
Kattuffiup neriuutigaa, peqataasussat 169-t unammersuarfiusumi nunatsinnullu uterunik atisat atorluartarumaaraat.
OL-imut assigusoq
- Arctic Winter Games ukioq ataaseq allorlugu ingerlanneqartarpoq. 2014-imi Fairbanks-imi ingerlanneqarpoq, 2016-imilu Nuummi ingerlanneqarluni. Ukioq manna South Slave-mi illoqarfinni Hay
River aamma Fort Smith-imi ingerlanneqassaaq.
AWG timersornermik kulturikkullu pikialaarnermik pisoqarfiusumik ingerlanneqartarpoq. Meeqqat, inuusuttut aqutsisullu nunat issittormiut akunnerminni ataatsimut naapiffigisartagaat. Unammiuaarneq OL-ip aaqqissuunneqartarneranut eqqaanarsinnaavoq, Kalaallit Nunaanni Timersoqatigiit Kattuffiat allappoq.
AWG 18. martsimiit 24. marts tungaanut ingerlanneqassaaq.