Arctic Winter Gamesimut aajuna eqqaamassutissaq

Bilo Høegh Stigsen ulluinnarni Kommuneqarfik Sermersuumi illoqarfimmi pilersaarusiornermut pisortaq, Arctic Winter Gamesimut eqqaassutissamik unammisitsinermi ajugaavoq.

Eqqaassutissaq katersuuffittut eqqarsaataavoq, Katuallu eqqaani inissinneqassaaq.

Naliliisut amerlasuut
Eqqaamassutissaq siunissami illoqarfiit pingaarnersaanni sapaatip akunnerani nuannerluinnartumut eqqaassutissaassaaq aammalu Arctic Winter Games 2016-imut aaqqissuisuusimanermut ilisarnaataassalluni.

Kommuneqarfik Sermersuumi borgmesteri Asii Chemnitz Narup, Ilinniartitaanermut, Kultureqarnermut, Ilisimatusarnermut Ilageeqarnermullu Naalakkersuisoq, Nivi Olsen aammalu Kalaallit Nunaanni Sulisitsisuni pisortaaneq Brian Buus Pedersen, Nivi Christensen Nuummi Eqqumiitsulianik Saqqummersitsivimmeersoq aammalu Ivinguak Storch Nunatsinni Eqqumiitsuliortut Peqatigiiffianni KIMIK-minngaanneersoq peqatigalugit unammisitsinermi ajugaasut toqqarpaat.

Siunnersuutit tamarmik siunnersuuteqartut kinaassusaannik isertuussineqartaqarput, naliliisullu aatsaat ajugaasunik toqqaareeramik peqataasut kinaassusaat paasivaat.

Eqqaamassutissaq sumiiffittut
Killiliussarititap nallernerani katillugit siunnersuutit aqqanillit assigiinngisitaartut tunniunneqarput.

Siunnersuutit tamarmik suliap allaaserineqarneranik eqqaamassutissiallu qanoq isikkoqarnissaa eqqarsaatigineqarnersoq, qanoq akeqarnissaa kiisalu piffissaq atorneqartussaq pillugit imaqarput. Tassalu Bilo Høegh Stigsenip siunnersuutaa naliliisussanit nuannarineqarnerpaajuvoq.

Kommunip pilersaarusiornermut pisortaa - ilusilersukkamik siunnersuummik suliarinnittuusoq suliffimmi avataani soqutigisatut suliani illoqarfimmi ataatsimoorfimmik pilersitsinissani neriuutigaa.

Alapernaaffiunissaa neriuutaasoq
- Eqqaamassutissamik ilusilersugaannaanngitsumik, kisiannili illoqarfimmi inoqannginnersami sumiiffeqarnissaq pingaartippara.

- Taamaalilluni ilisarnaqutaassaaq qimerluuataaginnarneqartussaanngitsoq, kisiannili aamma katersuuffiusussaq. Ilusilersukkatut nunamut ilassuuttumik taaguusernikuuara, pissutigalugu majuartarfeqarmat naapisimaartarfiusinnaalluni. Peqatigitillugu atortussat unammillernartuunissaat kissaatigivara aammalu eqqaamassutissap illua tungaani qangattaqanissaa soqutiginnilersitsissasoq neriuutigalugu, taama AWG-mi eqqaamassutissiortussatut ajugaasoq Bilo Høegh Stigsen oqarpoq.

Sulinermut ikioqatigiinnermullu ilisarnaat
- Soorunami siullertut pingaarnertullu Arctic Winter Games 2016-imi marsimi sapaatip akunnera nuannerluinnarsimavoq, kisiannili taamaannerani allarpassuartigut issimalluni. Eqqaamassutissaq illoqarfiup aaqqissuisuuneranut malunnaataassaaq, kisiannili aamma nammineq kajumissutsiminnik, namminersortut pisortallu suliffeqarfiutaat ataatsimoorlutik aaqqissuussamut tapertaallutik ikiuussimanerinut ilisarnaqutaassalluni.

Atuaruk: AWG 2016-imi ujaminnattaat amerlassusaat GIF-ip nalilerpaa

- Isumaqarpunga unammisitsinermi ajugaassutaasoq kusanarluinnartuusoq toqqarsimallutigu, illoqarfitsinni kusanarluinnartumik kusassaataajumaartoq aammalu ataatsimoorluta annertoorujussuarmik suliaqarnitsinnut eqqaamassutissaajuassalluni, taamatut borgmester Asii Chemnitz Narup oqarpoq.

Bilo Høegh Stigsenip eqqaamassutissatut siunnersuutaata pappiaqqamiit naammassinissaata tungaanut suliarinissaa ingerlaannaq aallartinneqassaaq ukioq mannalu aggustip aallaqqaataani naammassineqarnissaa naatsorsuutigineqassalluni.

Siunnersuutinut pingasunut ajugaasut
Bilo Høegh Stigsenili kisimi siunnersuumminut nersorneqanngilaq.

Siunnersuutit pingasut akissarsissutigineqarput:

1. Akissarsititaasoq: Bilo Høeg Stigsen, 25.000 koruunit

2. Akissarsititaasoq: Niels Motzfeldt, 15.000 koruunit

3. Akissarsititaasoq: Naja Rosing-Asvid, 10.000 koruunit

AWG-p eqqaassutissaanut titartakkat uani ataani takukkit