Arctic Sportsimi unammersuarnerit: Inuit pinnguaataat soqutigineqarneruleriartortut
One-foot high-kick, airplane, pakassumminneq, fingerpullilu Nuussuup eqaarsaartarfiani Nuummi sapaatip akunnerani matumani unammissutigineqartaalerput. Arctic Sportsimi nunatsinni unammersuarnermi peqataasut aatsaat taama amerlatigipput. Aaqqissuisut tamanna nuannaarutigaat.
Nunatsinni sumiiffinnit aqqanilinnit inuit pinnguaataannik unammisartut 115-it Nuummi Arctic Sportsimi ulluni makkunani unammersuarnermi peqataapput.
Unammersuarnerni aaqqissuisut, Inuit & Dene Games Nuuk, inuit pinnguaataannik soqutiginnittoqarnerulernera maluginiarpaat.
- Klubbit amerliartorput. Ukioq mannalu pissartanngorniunnerni peqataajumasut amerlalluinnarmata peqataasinnaasut ukiui, klubbiniillu aallartitaasinnaasut killilertariaqarsimavagut, pissartanngorniunnerit piffissaqarluta torersumillu ingerlassinnaaniassagatsigit, Arctic Sportsimi unammersuarnerni aaqqissuusseqataasoq, Dida G. Heilmann Sermitsiaq.AG-mut oqaluttuarpoq.
Klubbit tamarmik amerlanerpaamik 25-inik aallartitaqarsinnaapput, qulillu ataallugit ukiullit peqataasinnaanatik.
Pisussat tulleriiginnavissasut
Ullumikkumiit arfininngorneq ilanngullugu Arctic Sportsimi pissartanngorniuttoqassaaq. Ullut arfinillit ingerlaneranni unammiffiusussat 16-it piareersarneqarsimapput.
Arctic Sports aallarnerlugu ataasinngornermi two foot high kick ingerlanneqarpoq. Tamannalu peqataasut akornusersortinnginnissaannik pisariaqartitsivoq.
- Qummut pissittarluni unamminermi, soorlu one-foot imaluunniit two-foot high kickimi, peqataasut suliaminnut tinguartilluinnarnissaat akornuserneqannginnissaallu pingaaruteqarluinnarpoq. Isiginnaartut taakkunani nipaarsaarluartariaqarput. Timersuutit allat nukkiornarnerusut isiginnaartunit nipiliorfigineqarnerusinnaajumaarput, Dida G. Heilmann oqarpoq.
Unammersuarnerit Nuussuup eqaarsaartarfiani ingerlanneqarput, isiginnaariallu akiliinatik isersinnaallutik. Ullaakkut nal. qulit qeqqaniit unnukkut nal. qulingiluanut unammiuaarnerit ingerlanneqartassapput.
- Timersuutitsinni ilisarnaatigaarput akeraqannginnatta. Unammisarput pigaarneq tassa nammineq, imminut unammivugut, pitsaanerulerniarluta. Pitsaanerulerumalluta aamma ikioqatigiittarpugut, suminngaanneerfik apeqqutaatinnagu. Taamaammat ataqatigiilluinnarpugut, timersuutinullu allanut sanilliutissagutta allanut akeralersortuunata, Dida G. Heilmann naggasiivoq.
Unammeriuseq Snow snake, tassa qisummik aputikkut sisoortitsilluni takiniunneq, ukioq manna ilaatinneqanngilaq, Nuuk aputikinnerulernera pissutigalugu.