Arctic Soundsimi nipilersortussat saqqummiunneqarput
Arctic Sounds ulluni tallimani Sisimiuni pisussaq, Koda Awardsimit 2023-mi innersuunneqartunit tamanit peqataaffigineqassaaq. Nipilersornermik festivali tamatuma saniatigut suliniutinik arlalinnik imaqarpoq.
Andachan, SIGU aamma Naja P.
Koda Awards 2023-mi innersuunneqartut tamarmik Sisimiunut tikillutik ukioq manna Arctic Soundsimi nipilersussapput.
Aaqqissuisut tusagassiuutinut nalunaarummi tamanna saqqummiuppaat.
Ulluni tallimani 6. april aallartittumik festivalertoqalerpat nipilersortussat nutaat aamma ilisimaneqarluartut piareeqqasut, tassani atuarneqarsinnaavoq. Piareersarnerit kingulliit inissileruttorput, pilersaarutillu tamarmiusut saqqummiunneqangajalerput, aaqqissueqataasoq Laura Lennert Jensen ilisimatitsivoq.
Nipilersortartut nunanit allaneersut
Taanna nangippoq:
- Kalaallit Nunaannit, Nunanit Avannarlernit aamma Nunavumit nipilersortartut, kiisalu attaveqarfiit, kajumissutsimik suliaqartut festivaleriartullu Sisimiunut ukioq manna tikilluaqqoqqinnissaannut qilanaaqaagut.
Nipilersornermik festivalertitsineq ukioq manna suliniutinik assigiinngitsunik imaqassasoq, taanna oqaluttuarpoq. Ilaatigut suliniut Aajuik-mik taaguutilik, Kalaallit Nunaannit Nunavumit nipilersortartut Islandimi naapillutik ulluni sisamani immiussissapput.
Ukioq manna Arctic Soundsimi festivalertoqarnerani kalaallit nipilersortartut saniatigut Josh Qaumariaq, James Ungalaq kiisalu Andrew Morrison Nunavut-mit tikissapput.
HUN SOLO – nipilersorluni tusarnaartitseriaaseq
Nunat allat sinnerinit ilaatigut nipilersortartut Bird People, Soleima, Jenny Wilson allarpassuillu tikissapput, tusagassiuutinut nalunaarummi tamanna oqaatigineqarpoq.
Taakkartorneqartoq kingulleq tusarnaartitseriaatsimut HUN SOLO-mut ilaavoq, taassuma siullermeerluni Arctic Sounds peqataaffigissavaa. HUN SOLO suliniutaavoq arnanik aamma suiaassuseqanngitsunik nipilersortartunik ataasiakkaanik saqqummersitsinerusoq, tassani suiaassutsikkut agguarneqarnerisa equnganerat Nunani Avannarlerni Kalaallit Nunaannilu sammineqarpoq.
- Arctic Soundsip nipilersornermi aamma inuiaqatigiit sinnerini unammilligassat assigiinngitsut oqaluuserinniffiunissaa uagutsinnut pingaaruteqarluinnarpoq, Laura Lennert Jensen oqarpoq:
- Ilaatigut HUN SOLO-p ukioq manna festivalimut ilaanera nuannaarutigeqaarput, kujataaneersorlu Thelma Kajsdóttir tassunga ilaassaaq, Laura Lennert Jensen oqarpoq.