Arctic Prime Fisheries-ip pisortartaava nipangersimavoq
Aalisarnermik ingerlatsivimmi ajornartorsiortumi APF-imi Malakias Andreassenip pisortatut kingoraartaa Hentzar Petersen oqaaseqarumanngilluinnarpoq. Suliffissuit ingerlanneqarnerat kilisaatinillu tunisinerit ammasumik oqaaseqarfigiumanngilai.
Aalisarnermik ingerlatsiviup ajornartorsiortup Arctic Prime Fisheriesip, APF, siunissaa nalunartulik pillugu ingerlatsiviup pisortaanertaava Hentzar Petersen oqaaseqarumanngilluinnarpoq.
Aviisi Sermitsiaq taama allappoq.
Taassuma juuni aallartittoq aalisarnermik ingerlatsivimmi, apriilimi aalisarnermik akuersissutinut nakkutilliisoqarfimmit aalisarnermut inatsimmik unioqqutitsisimasutut Kalaallit Nunaanni Politiinut suliassanngortinneqartumi, Malakias Andreassen pisortatut taarserpaa.
Hentzar Petersenip Arctic Prime Fisheriesimi piginneqatigiissutit amerlanerpaat pigai. Taanna pisortanngoramili naatsorsuutigineqarsinnaasutut ingerlatsivik sinnerlugu oqaaseqartartussaagaluarpoq. Selskabili qaqugu ajornartorsiorunnaarsinnaanersoq pillugu tamanut ammasumik oqaaseqarumanngilaq.
Hentzar Petersenip uppernarsarpaa selskabip umiarsuit avataasiutit marluk, Tasermiut aamma Iivid, tunisimagai. Tunineqarneralli oqaaseqarfigiumanngilaa.
– Tamanna ilumoorpoq. Savalimmiuniippunga feeriarlunga, illorpullu qalipaleruttorpara. Apeqqutivit akinissaannut ajoraluartumik piffissaqanngilanga, Hentzar Petersen Sermitsiap tusagassiortuanut oqarpoq.
- Aamma siusinnerusukkut oqaaseqarusuttarsimanngilatit. Allassinnaavunga umiarsuit tunineqarnerat suliffissuillu ingerlanneqarnerat oqaaseqarfigiumanngikkitit?
– Taakkua oqaaseqarfigisinnaanngilakka.
Aviisimi Sermitsiami allaaserisaq tamakkerlugu atuarsinnaavat: