Arctic Park sangusaarnermut naleqqutinngiulaq
Suliniummut, nunani tamalaani sisoraatinik timersuutinut piumasaqaataasunik naammassinninngitsumut, aningaasat atorniarneqartut amerlavallaaqaat, taamatut naliliipput sisorartartut snowboardertartullu arlallit
Kommuneqarfik Sermersuumi 2021-imut missingersuummut isumaqatigiissut, oktobarip 23-ianni akuersissutigineqartoq, naapertorlugu kommunip sunngiffimmi timersornermilu sammisassat ineriartortinnissaat sulissutiginiarpaa, Sermitsiaq allappoq.
Kommunimi timersortartut tamarmik tamanna nuannaarutigaat. Suliniulli ataaseq isumaqatigineqanngilaq, tassa Quassussuup tunuani Arctic Parkiliariniarneqartoq, kommunalbestyrelsimi ilaasortanit amerlanerussuteqartunit taperserneqartoq.
Suliniut taanna TNT-mit suliarineqarsimavoq, Sisorarfiit ulluinnarni aqutsisui, Morten Jørgen Heilmannimit siulittaaffigineqartut, suleqatigalugit. Partiit isumaqatigiissuteqartut suliniut akuersaaraluaraat taamaallaat Quassussuup tunuanut aqqusinermut tassanilu lejrskolimi illuaqqanut, kiisalu suliniutip pilersaarusiorneqarneranut aningaasaliisoqarsimavoq.
Tamatuma saniatigut ukiuni missingersuuteqarfiusuni tulliuttuni suliniummut aningaasaliissuteqartoqarsimavoq, aningaasalli sumorpiaq atorneqassanersut allassimanngilaq.
Allamut inissillugu
Sisorarfiilli siulersuisuini ilaasortat ilaat oqarput tusarniaavigineqarsimanatik suliniummullu peqataatinneqarsimanatik isummaminnik saqqummiussinissaminnut, pingaartumillu pineqarput sisoraatinik timersuutit soorlu sangusaarneq, super G, freestyle aamma snowboard.
– Sisorarnermi løjpit, Arctic Parkimi siunnersuutigineqartut, naammattumik pitsaassuseqanngillat, taamatut oqarpoq Jens Kristian Berthelsen, taannalu Siumut tunuliaqutaralugu kommunalbestyrelsimut ilaasortaavoq sisorartartullu klubbianni N-84-imi siulittaasuullunilu Sisorarfiit siulersuisuini ilaasortaavoq. Taanna ilaatigut taperserneqarpoq Sisorarfiit siulersuisuini ilaasortanit Klaus Frederiksenimit Aputsiaq Kristensenimillu, taakkualu isumaqarput kommunip siunissami sisorartarfissaa Kangerluarsunnguup kujataanut, Kang Skicenterip inissisimaffigisaanut, inissinneqartariaqartoq.
Jens Kristian Berthelsen isumaqarpoq suliniutikkut tassuuna kommunip namminersortut suliniutaat Kang Skicenter, snowboardernissamut, freestylernissamut, sisoraatinik sangusaarnissamut sisoraatinillu oqilaniunnissamut ilaalu ilanngullugit, inissisimalluarnerujussuaq, unammillerniaraa. Tassani atortut ullumikkut kommunip suliffeqarfiutaanit assigiinngitsunit atuarfinnillu atorneqartarput, taanna ilanngullugu oqarpoq.
Allaaserineqartoq aviisimi Sermitsiami tamakkiisumik atuaruk. Aviisi uani pisiarineqarsinnaavoq:
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...
