Arctic Circle Race
Arctic Circle Racemut peqataanissamut suli periarfissaqarpoq
Ujakkaarnermik unammititsineq Arctic Circle Race Sisimiuni ingerlanneqartartoq qaammatit marluk qaangiuppata aallartinneqassaaq. Aamma unammisitsisarneq pillugu mini-filmfestivalertitsisoqassaaq
Arctic Circle Race 2015-imi ukiut 19-issaannik, marsip 20anniit 22ata tungaanut ingerlanneqassaaq. Ingerlaarfissap aputeqarnissaa qulakkeerniarlugu, pisarnermiit ullunik 14-inik siusinnerusukkut ukioq manna aallartissaaq, ukioq mannalumi aputeqarluarniannguatsiarluni.
Peqataasussat nunanit allaneersut marsip 17-ianniit 24-ata tungaanut Sisimiuniissapput, kalaalaallillu peqataasussat namminneq qaqugukut tikissanerlutik aallassanerlutillu aalajangissavaat, aaqqissuisut tusagassiutinut nalunaaruteqarput.
Tusagassiuutitigut soqutigineqaqaaq
Tusagassiornermik suliallit 20-it missaat ACR-imut malinnaajartortut Sisimiuniittussaapput. ACR-imi ingerlaannarsinnaaniaruni nunarsuatsinni tamani eqqartorneqarsinnaasariaqarpoq. Filmiliat, aviisit, TV kiisalu radio maluginiarneqartarput, taamaalillutillu ukiup tulliani ACRimut peqataarusuttunik soqutiginnilersitsisarlutik.
Atuagassiaq Outdoor Training nammineq peqataatitsiniarpoq, kiisalu Swiss national TV (SRF) fatbikenik taaneqartartunik mountainbikertunik marlunnik, unammissutaasut saniatigut peqataasunik malinnaassalluni.
Sapernartunik timersuutit pillugit aallakaatitassiamik 'Boundless'-imik aaqqissuisartut Canadamiit USAmiillu tikissapput. Aallakaatitassiaq taanna nunarsuatsinni angerlarsimaffinni 100 millionini isiginnaarneqartarpoq.
Kalaallit Nunaanniit Sisimiut TV kiisalu Sisimiut Tusaatat, KNR kiisalu Nuummi Malou Media suleqatigalugit ACRimi malinnaatitsissapput. Taakkua saniatigut aamma Greenland Today peqataassaaq.
ACR filmfestivali ukiunilu 20-nngortorsiorneq
Arctic Circle Race 2015ip ingerlannerata nalaani Danish Adventure Film suleqatigalugu, filmfestivalimik mikisumik aaqqissuisoqassaaq.
Kulturip illorsuani Taseralimmi adventure filminik pinngortitamut tunngasunik, aqajannguummernartunik, pissanganartunik misigisassarsiutigalunilu timersortarnermik nunannarisallit isiginnaarsinnaassallutik. ACR-ip unnuisarfiani unnukkut ajornanngippat innamut seqertitsilluni filminik naatsunik takutitsisoqassaaq.
2016-imi 20-ssaanik ACR ingerlanneqartussaammat, piareersaanerit maannagaaq aallartinneqarput. 2016-imi apriilip aallaqqaataannit pingajuata tungaanut ACR-ip ingerlanneqarnissaa naatsorsuutigineqarpoq. Peqataasussat nunanit allaneersut 2016-imi marlunngorneq marsip 29-anniit marlunngorneq apriilip tallimaata tungaanut Sisimiuniinnissaat naatsorsuutigineqarpoq.