Arctic Circle Racemik unammisut aallarput
Sisimiuni Taseraliup saavani Arctic Circle Racemi siulersuisuni siulittaasup Jens Klaus “Kasik” Lennertip unammersuarneq aallartillugu ullaaq nal. 10.00 seqqorpoq, sisoraatinillu unammisut 167-it ilaai Australiameersut, Nuummiit siullerpaamillu Sydafrikamiit peqataasoqarluni.
Pisarneq malillugu sisorartut arena kaajallallugu arpapput tøse bakkenikkullu ammut sisusut isiginnaartunut qiimmassarlugit nilliaffigineqarput, Sisimiullu timaanut ingerlaartut aalateriffigalugit aallartippaat.
- Peqataasut 62 procentinik siornamut sanilliullugit amerlanerupput, amerlassussaat ajorisassaanngillat, siulersuisuni siulittaasoq Jens Klaus “Kasik” Lennert oqarpoq, taanna nassuiaavoq, arnani 2015-imi 2017-imilu ajugaasoq Tyrkiamiu Kamila Burotova kingumut aamma peqataasoq.
Siorna ajugaasoq nunatsinneersoq Martin Møller peqataavoq, taannalu marlunnik unammineqarluarumaarmat aappaa Olymiademi unammisartoq Australiamioq unammisassaatalu aappaa Frankrigemiuulluni inuuniutigalugu sisorartartoq.
Utoqqaanersaq 81-inik ukiulik
Unammisuni utoqqaanersaq 81-inik ukioqartoq.
Nunarsuarmi sisoraatinik unamminerit sakkortunersaat 160 kilometerinik isorartussuseqarpoq aamma 100 kilometerisut isorartutigisumik tassani peqataasoqarsinnaalluni, unammineq ulluni pingasunik sivisussuseqartoq apriilip aappaanni Taseralimmi ajugaasup peqataasullu apuunneratigut naammassineqassaaq. Sisimiormiuaqqat meeqqat inuusuttuaqqallu arfininngornermi sapaammilu MIKI ACR-imik unamminissaminnut periarfissaqassapput.
Arctic Circle Racep campia ukioq manna aamma illoqarfimmut qanittumiissaaq.
- Igloo Mountainip maskinaatai pisoqalimmata oqimaatsunik assartuinermi aserortoornissaq pinaveersaartinniarlugu qanittumi camp-iliortoqaqqippoq, Jens Klaus “Kasik” Lennert oqarpoq