Arctic Circle Race taamaatiinnarneqarpoq

Sisoraatinik unammeriaatsit sakkortunersaat corona pissutigalugu taamaateqqiinnarneqarpoq.

Arctic Circle Racemik aaqqissuisut corona pissutigalugu aaqqissuussminnik appassaanik taamaatitsiinnartariaqalersimapput. Taamatut attaveqaqatigiinnermi pisortaq Ane Carlsen Sertisiaq.AG-mut ilisimatitsivoq.

- Nalunngilarput namminneq piumassutsiminnik ikiuuttartut, najukkami innuttaasut ujakkaartartullu nunarsuarmit tamarmeersut uatsituulli Arctic Circle Race maqaasigaat. Taamaammat ajuusaarutigilluinnarparput coronap tuniluunnera pissutigalugu Arctic Circle Race taamaateqqiinnartariaqaratsigun.

Arctic Circle Race 2021-mi martsip 26-ani aallartinneqartussaagaluarpoq, tamannili pisinnaanngilaq.

- Covid-19-ip Kalaallit Nunaanni nunanilu allai qanoq ingerlanera Arctic Cirdcle Racemit malinnaaffigisimavarput. Killilersuutit sukanganerusut aamma coronap allaasup tuniluutianerujussuusup siaruaakkiartornera pissutigalugit ajoraluartumik takorlooruminaatsissimavarput, Arctic Circle Race 2021-p toqqissisimasumik illersorneqarsinnaasumillu qaammatip pingasuinnaat qangiuppata qanoq ingerlassinnaanerlutigu.

Isumannaatsuuneq toqqissisimanerlu

- Arctic Circle Racep isumannaatsumik toqqissisimanartumillu ingerlanneqartarnissaa pingaartittuaannarsimavarput. Tassa Arctic Circle Racep ingerlanneqarnerani naammassineqarneranilu namminneq piumassutsiminnik ikiuuttut Sisimiunilu innuttaasut eqqarsaatigalugit. Tamanna soorunami aamma Coroanp atuunnerani atuuppoq. Taamaammat inniminniinissat, pisiortornissat aningaasaliissuteqarnissallu pisariaqartinneqartut aningaasarpassuarnik annaasaqarata isumagisinnaasimanngilagut, Ane Carlsen aaqqissuisooqatigiit 2022-mi ingerlatsinissamik eqqarsaateqarnerartut ilisimatitsissutigalugu oqarpoq.

Ane Carlsenip neriuutigaa, nunarsuarmi sisoraatinik unammeriaatsit sakkortunerpaartaattut taaneqartartup 2022-mi ingerlanneqanissaanut sapaatip akunnerata tulliani ulluliisoqarumaartoq.

Arctic Circle Race 1998-imi siullermeersumik ingerlanneqarpoq - tamatumalu kingorna ukiut tamaasa 2019-ip tungaanut ingerlanneqartarluni. Siorna corona pissutigalugu ingerlatsinissaq taamaatiinnarneqarsimavoq - tamannalu ukioq manna aamma pilluni. Sisoraatinik unammiuaarneq Sisimiuni ingerlanneqartarpoq, peqataasut ulluni pingasuni illoqarfik qimallugu 160 kilometerit ingerlaarfigisarpaat, qaqqanilu tuperni unnuisarlutik. 2019-imi inuit 167-it Kalaallit Nunaanneersut nunanillu allaneersut peqataapput.

Arctic Circle Race Sisimiut pisartut annersaasa ilagisarpaat, tassani innuttaasut isiginnaartutut namminnerlu piumassutsiminnik ikiuuttartutut tapersersuilluartarlutik. 2019-imi namminneq piumassutsiminnik ikiuuttut 250-iusimapput. Sisoraatinik unammiuaarneq ataatsimiititaliamit Jens Klaus Lennertimik (Kasik) siulittaasulimmit aaqqissuunneqartarpo. Arctic Circle Racemik aallarniisut ilagaat maanna toqukkut qimagutereersimasoq Larseraq Skifte.

Powered by Labrador CMS