Arctic Circle Business: Ammaaqqinnissamut pilersaarut atorsinnaanngilaq
Coronamut akiuussutissalertissimagaluaraanniluunniit Kalaallit Nunaannut tikinnermi ulluni tallimani mattusimasussaaneq takornariartitsinermik inuussutissarsiuteqartut aningaasatigut annaasaqaatigingaatsiassavaat, Arctic Circle Business allatut aaqqiissuteqartoqarnissaanik ujartuisoq erseqqissaavoq.
Arctic Circle Business coronap tuniluunnaveersaartinneqarneranut peqatigitillugu takornariartitsisinnaanermik qulakkeerinnittussanik allatut aaqqiissutissarsiortoqarnissaanik ujartuivoq.
- Nunani tamalaani takornariartitsinermik inuussutissarsiuteqartut akiuussutissalertereersimanermi Kalaallit Nunaat tikeraassallugu pilerigineqarnerpaassasoq siulittuiffigisimavaat. Maannali periuserineqartoq, tassa Naalakkersuisut nutaat naalakkersuisuusimasut periuserisimasaannik malinniinnarnerat iluaqutaanavianngitsutut taaneqarpoq, takornariarlutimmi tikittunut takornariartitsinermik inuussutissarsiuteqartunit tikilluaqqusisussaqanngimmat, Arctic Circle Businessimi pisortaq Jesper Schrøder tusagassiorfinnut nalunaaruteqarnermi oqarpoq.
Taassuma takornariat tikittarfii qitiutillugit eqaatsumik aaqqissuussisoqapallattoqarsinnaanera allatut aaqqiissutissaasinnaasoraa.
- Assersuutigalugu Kangerluarsuarmiut akiuussutissalerneqareerput, tassani killilersuinerit sakkukillineqarsinnaapput. Siorna pissutsit takutippaat, pinngortitami mattusimasoqarsinnaaneranik neqerooruteqartoqarsinnaasoq.
Aaqqissuussaq annertooq taamaatiinnarneqarsinnaasoq
Arctic Circle Businessimit ernummatigineqarpoq, Kalaallit Nunaanni aaqqissuussat annersaat ilaata, Extreme-E, aggustusip qaammataani ingerlanneqartussatut pilersaarutaasup taamaatiinnarneqartariaqarsinnaanera. Tamannalu tunngavigalugu kaammattuutigineqarpoq, ”oqartussat qanimut ataqatigiissaareqatigalugit aaqqissuussap ingerlanneqarnissaa”.
Suliniaqatigiiffiup tammajuitsussarsiniartarfiit akiliisinnaajunnaarsinnaanerat immikkut ernummatigaa, ”taakkumi ikiorsiissuteqarnermut ilaatinneqanngimmata”. Peqatigitillugu ikiorsiissuteqartarnerup sivitsorneqarnissaa kissaatigaat, takornariartitsinermimmi inuussutissarsiuteqartut miliuunilippassuarnik annaasaqareersimammata.