Arctic Circle Business nutaanik siulersuisortaarpoq
Siulersuisut arfiniliusut ullumi, ukiumoortumik ataatsimeersuarnermi, toqqarneqarput. Sinniisullu marluk aamma qinerneqarlutik.
Arctic Circle Businessip nalinginnaasumik ataatsimeersuarnerani, ilaasortat katillugit 35, Sisimiuniit, kiisalu nittartakkakkut peqataallutik Maniitsumiit Kangerlussuarmiillu, peqataapput.
Arctic Circle Businessimit suliat soqutigineqaleraluttuinnartut suliniutinik nutaanik
ingerlatitsilerput aammattaarlu inernernik katerinnermi pilersitsisoqarluni, Arctic Circle Business tusagassiutinut nalunaaruteqarluni allappoq.
Anette Lings siulersuisuni siulittaasutut qinerneqaqqippoq.
Siulersuisut ima inissipput:
- Siulittaasoq, Anette Lings, Hotel Sisimiut
- Siulittaasup tullia, Henrik Sachse, Arctic Cat
- Ilaasortaq, Søren Damgaard Olsen, Royal Greenland
- Ilaasortaq, Paneeraq Olsen, Grønlands Banken
- Ilaasortaq, Mia Chemnitz Høegh, Qiviut
- Ilaasortaq, Ole Damgaard, Hotel Kangerlussuaq
- Sinniisoq, Arne Hardenberg, Greenland Extreme
- Sinniisoq, Maannguaq Lauritzen, Sarfalerisut ApS
Arctic Circle Business, namminersortutut suliaqartuusoq, suliffeqarfinnik namminersortunik aallartisaasunillu siunnersuisarpoq, najukkami inuussutissarsiutit nukittorsarnissaat anguniarlugu.
- Pitsaalluinnarpoq suliffeqarfiit namminersortut amerlasuut inuussutissarsiornermi
ineriartortitsinermut ingerlatseqataarusummata. Maannakkoqqissaarmi pisariaqartilluinnarparput ataqatigiilluta kivitseqatigiinnissarput, Arctic Circle Businessimut tapersersuineq Qeqqata Kommuniani suliffeqarfinniit aamma taama takutsitsinervoq, siulersuisuni siulittaasutut qinerneqaqqittoq, Anette Lings oqarpoq.