Aqutsisutut misilittagartooq aqutsisoqarfimmi pisortanngorpoq
Aningaasaqarnermut Sulisoqarnermullu Aqutsisoqarfimmi pisortatut Lise Lennert Olsen atorfinitsinneqarpoq.
Ukioq ataaseq qaangiutilaartoq Lise Lennert Olsen Aningaasaqarnermut Sulisoqarnermullu pisortaangallarnermiit pisortaanertut atorfinitsinneqarpoq.
Ilinniagaqarnera atorfigisimasaalu
Lise Lennert Olsen Sisimiuni 1959-imi inunngorpoq.
1987-imi Københavns Universitetimi eskimologiimi kandidatitut ilinniarnerminik naammassinnippoq.
Ukiut arlallit ingerlanerini pisortani aqutsisutut atorfiit pingaarutillit arlallit atorfigisimavai, ilaatigut Kultureqarnermut, Ilinniartitaanermut, Ilisimatusarnermut Ilageeqarnermullu Pisortaqarfimmi pisortatut kingusinnerusukkullu siullermik Kultureqarnermut, Ilinniartitaanermut, Ilisimatusarnermut Ilageeqarnermullu Naalakkersuisoqarfimmi pisortatut kiisalu kingorna Ilaqutariinnermut, Kultureqarnermut, Ilageeqarnermut Naligiissitaanermullu Naalakkersuisoqarfimmi pisortatut.
Tamatuma kingorna Knud Rasmussenip Højskoliani forstanderiuvoq
Maajip aallaqqaataani Aningaasaqarnermut Sulisoqarnermullu Aqutsisoqarfimmi sulisoqarnermut pisortaalluni, maannali atorfinitsitsinissamut ataatsimiititaliami tamanit isumaqataaffigineqartumik tassani aqutsisoqarfimmi pisortatut atorfinitsinneqarpoq.
Siammasissumik attaveqaatilik
- Nuannaarutigingaarpara, ASA-mi aqutsisoqarfimmut pisortatut atorfimmut misilittagalimmik piukkunnaateqartuillu atorfinitsitsinissaq iluatsinneqarmat. Kalaallit Nunaanni pisortani ingerlatsinermi ASA’p sulinera annertuumik pingaaruteqarpoq. Aqutsisoqarfik tassaavoq, Kalaallit Nunaanni pisortani suliassaqarfimmut tamarmut kiisalu suliatigut peqatigiiffinnut minnerunngitsumillu Namminersorlutik Oqartussani sulisorpassuarnut siammasissumik attaveqartartoq. Taamaattumik pingaaruteqarluinnarpoq, aqutsisoqarfimmi pisortap tatiginartuunissaa kiisalu aqutsisoqarfiup iluani kiisalu avataani illuatungerisanut atatillugu suleqateqarnermik ilaatitsilluni siuarsaasinnaanissaa, Aningaasaqarnermut Naalakkersuisoq Pele Broberg tusagassiuutinut nalunaarummi oqarpoq.
Erngertumik atorfinittoq
Lise Lennert Olsen aqutsisoqarfimmi pisortaagallartutut atorfeqareerpoq, taamaattumillu aqutsisoqarfimmi pisortatut atorfeqarnini erngertumik aallartissallugu.