Skip to main content

Aqutsisoqarfimmi pisortaq: Sulilerlaat arlariinnik malittarisassaqarput

Peqqissutsimut Pitsaaliuinermullu Aqutsisoqarfimmi pisortaq, Joanis Erik Køtlum oqaluttuarpoq sulilerlaat sulinerminni arlariinnik malittarisassaqartinneqartut.

Peqqinnissaqarfimmi sulilerlaat tikinniutaa ullut tallimat angerlarsimaqqaaratik suliartortarnerat, peqqinnissaqarfimmi sulisunut ernumatitsivoq.

Peqqissutsimut Pitsaaliuinermullu Aqutsisoqarfimmi pisortaq, Joanis Erik Køtlumip sulisut ernumanerat paasisinnaalluarpaa. Peqqinnissaqarfiulli iluani coronavirusip tunillaassuutileratarsinnaaneranik pinaveersaartitsisoqartoq erseqqissaatigalugu:

- Sulilerlaanut arlalinnik maleruagassaqarpugut. Illersuutit atorneqartarput. Sulilerlaat aamma ilisimatinneqartarput suleqatinut, nakorsianut ilaqutaasunullu qanillinaveersaassasut, aammalu allanut akulerunnaveersaaqqaassasut, Joanis Erik Køtlum Sermitsiaq.AG-mut oqaluttuarpoq.

Sulilersussat aamma innersuunneqartarput Kalaallit Nunaannut aallannginnerminni allanut akulerunnaveersaaqqullugit, sammisaqaqatigiittunut akuleruteqqunagit influenzamullu illersuummik kapiteqquneqartarlutik.

LÆS OGSÅ: Peqqissaasut tunillatsinnissamut ernumasut: Sulilerlaat ilaat mattusimaqqaarneq ajorput

Aqutsisoqarfimmi pisortap erseqqissarpaa qanillinaveersaarnermut, eqqiluisaarnermut allanullu attaveqarnermut oqartussat innersuussutaat, sulisunit malinneqartut.

Sulisussaaleqisut

Joanis Erik Køtlumip ilisimatitsissutigisinnaangilaa ulluni tallimani angerlarsimaannarallarnissamut piumasaqaat qanoq akulikitsigisumik atuutsinneqarneq ajornersoq.

Sumiiffinni immikkoortortaqarfiit namminneerlutik pissutsit nalilersortarpaat, nalilertarlugulu sulilerlaaq nunatsinnut tikeqqammersoq angerlarsimaannarallassanersoq imaluunniit ingerlaannaq sulilersinneqassanersoq:

- Imaakkami inuiaqatigiinni pingaarutilinnik arlalinnik atorfeqaratta, taakkulu inuttalernissaat pisariaqarluinnarluni. Sulilerlaat angerlarsimaqqaartinneqaratik ingerlaannaq suliartornissaat pisariaqarluinnarsinnaasarpoq, aqutsisoqarfimmi pisortaq oqarpoq.

Tunillaassortoqalissagaluarpat

Joanis Erik Køtlum nassuiaavoq peqqinnissaqarfimmi sulisut qanoq tunillaassortitsinaveersaarnissamik ilisimasaqarluartut. Taamaammat sulisut tatigilluinnarpai tunillaassortitsinaveersaarnissamut maleruagassanik malinninnissaat.

Peqqinnissaqarfiulli iluani coronavirusimik tunillaassortoqalissagaluarpat, tamassumunnga Peqqinnissaqarfimmi Aqutsisut upalungaarsimanermut pilersaaruteqarput:

- Ajorluinnartumik pisoqassappat, Nakorsaaneqarfik qanimut suleqatigalugu tunillaassorfiit qulaajarneqapallassapput, tunillaassorneq annikinnerpaamiitinniarlugu, Peqqissutsimut Pitsaaluinermullu Aqutsisoqarfimmi pisortaq Joanis Erik Køtlum oqarpoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER