Aqutsisoqarfimmi pisortaq Ivaaqqami suliaq pillugu: Tamatuma qanoq pisimasinnaanera naluarput
Isumaginninnermut Aqutsisoqarfik Ivaaqqami najugaqartup innarlerneqarsimanera pillugu suliaq aallartinneqarmalli suliamik isumaginninniarluni Qaqortumiititaqarpoq. Ivaaqqami sulisut, aqutsisut najugaqartunullu ilaqutaasut Isumaginninnermut Aqutsisoqarfimmi tarnip pissusiinik ilisimasalimmit ikiorserneqarput, taamatut oqarpoq Aqutsisoqarfimmi pisortaq Helene Berthelsen.
Isumaginninnermut Aqutsisoqarfik innarluutilinnut paaqqinnittarfimmut Ivaaqqamut tamakkiisumik akisussaasuusoq, najugaqartup innarlerneqarsimanera saqqummiunneqarmalli Qaqortumiititaqarpoq. Aqutsisut Ivaaqqami sulisut, najugaqartut ilaqutaasullu isumaginiarlugit kiisalu arnap 23-nik ukiullip annertuumik innarluuteqartup sapaatip-akunnialuisa matuma siornatigut meerartaarneranut atatillugu suliami pissutsit misissuiffigineqarnissaat aallartinniarlugu Qaqortumukartitsisimapput.
Isumaginninnermut Aqutsisoqarfimmi pisortap Helene Berthelsenip tamatuma qanoq pisimasinnaanera oqaluttuarisinnaannginnerarpaa.
- Tamatuma qanoq qangalu imaluunniit sumi pisimasinnaanera naluarput. Pineqartup qanoq innerata allanngorsimanera arlaannaataluunniit malugisimanngilaa. Sulisut tamarmik imminnut ilisarisimasuupput, sulisut patajaattuupput aamma tamatuma pisinnaanera najugaqarfimmilu tamatuma qanoq pisimasinnaanera soorunami paatsuugassutigisupilussuuaat.
Sulisut pisuussuteqartutut misigisimasut
Helene Berthelsenip oqaluttuaraa, sulisut pisuussuteqartutut misigisimasut, arlallillu imminnut suleqatiminnullu aperisarsimapput pisimasoq pinngitsoortissinnaasimanerlugu.
- Misigissusaat sakkortuut iliuuseqarfiginiarlugit aamma misigisimasaasa saniatigut allatut sunnerneqannginnissaat anguniarlugu tarnip pissusiinik ilisimasalinnit oqaloqateqarnissamut neqeroorfigineqarsimapput.
Aqutsisoqarfimmilu pisortap tamanna pingaaruteqartuusoq erseqqissaassutigaa, taakkuuppummi najugaqartunik kisimik paaqqutarinnissinnaallutillu najugaqartunik nalunninngilluartit.
Aqutsisoqarfimmit suliaq saqqummiunneqarmalli, politiit misissuinerannut peqatigitillugu paaqqinnittarfiup ingerlaneqarnerani assigiinngitsutigut sukaterilluni suliaqartoqarpoq, aamma najoqqutassat malittarisassallu misissorneqarput, Helen Berthelsen oqarpoq.
- Isumaqarpunga innarluutilinnut atugassarititaasut, soorlu atugarissaartuunissaat peqqissuunissaallu sulinermi pingaarutillit ilaattut immikkut ukkatarisariaqarivut.
Isumannaatsuunissamut isumassarsiat nutaat
Taamaammat sulisut aqutsisullu Aqutsisoqarfimmi pisortaq Helene Berthelsen, innarluutilinnut immikkoortortaqarfimmi pisortaq Marie Sofie Pedersen immikkoortortaqarfimmilu pisortaq aamma Tarnip pissusiinik ilisimasallit pisortaat Naja Lund Kielsen peqatigalugit siunissaq eqqarsaatigalugu aaqqiissutaasinnaasunik assigiinngitsunik oqaloqatigiissuteqarsimapput.
Nanginik taarsiinermi uffartitsinermilu kiisalu unnuarsiornermi marluusarnissaq pillugu malittarisassaqareerpoq, taamaakkaluartoq sukaterisoqassaaq, taanna oqarpoq.
- Sulisut suut tamarmik takuneqarsinnaanerat anguniarlugu matut igalaalersorneqarnissaat siunnersuutigisimavaat. Isumassarsiaq alla, aqutsisut angajoqqaallu periarfissatut isigisaat tassaavoq nakkutiginninnermi atortussanik assiliissutinik ikkussuisoqarsinnaanera. Taamatut ittut inuit pisinnaatitaaffii pillugit inatsimmut attuumassuteqaraluartut, isumassarsiaq oqartussanut ingerlateqqissavarput, Helene Berthelsen naggasiivoq.