Aqutsisoqarfik nutaamik pisortartaalersoq

André Steenholdt-Guttesen Aningaasaqarnermut Sulisoqarnermullu Aqutsisoqarfimmi pisortanngussaaq.

Naalakkersuisut, 54-inik ukiulik André Steenholdt-Guttesen, Aningaasaqarnermut Sulisoqarnemllu Aqutsisoqarfimmi pisortassasut toqqarsimavaat.

Aqutsisoqarfiup ilaatigut Namminersorlutik Oqartussat sinnerlugi isumaqatigiissutissanik isumaqatiginninniartarneq akisussaaffigaa, aamma Namminersorlutik Oqartussat naatsorsuutaannik isumaginnittartuuvoq.

André Steenholdt-Guttesen politiitut ilinniagaqarpoq, Namminersorlutillu Oqartussat isumaqaatiginninniartarfianni 2002-mili atorfeqarsimavoq.

Neriulluartitsisoq

- Atorfimmut qinnuteqartumik misilittagartuumik, suliassanullu ingerlatassanut ilisarisimasaqarluartumik atorfinitsitsisinnaagatta nuannaarutigaara. Tamanna siunissamut neriullualersitsivoq, Aningaasaqarnermut Naalakkersuisoq Vittus Qujaukitsoq oqarpoq.

Vittus Qujaukitsup peqatigitillu Rikke Skram-Skuldbøl, aqutsisoqarfimmi pisortaagallarsimasoq qujassuteqarfigaa. Taanna, André Steenholdt-Guttesen juunip qiteqqunnerani atorfeqalerpat, sulisoqarnermut pisortatut atorfigisaminut uteqqissaaq.

Powered by Labrador CMS