Skip to main content

Aqutsinermi siunnersortit: Inuiaqatigiittut kinguaassiuutitigut innimiilliortarnerit akuerissanngilavut

Kinguaassiuutitigut innimiilliortarneq angutit ileqquisa ilagaat, suliniaqatigiifffiit inuiaqatigiillu nutaaliaasut sivisuumik akiorniarsimasaat. Partii Naleqqamit pisumut atatillugu ileqqorissaartuunissaq isummerfigineqarusunngippat akuiniarsimaneq kinguariarpoq.

Partii Naleqqap Mikael Petersen allaffissornermi qaffasissumik atorfinitsikkamikku, tassa Siumumi assinganik atorfeqarsimanerminit qimagussimatsiartoq atorfinitsikkamikku pissusilersuutigisartagaanik akuersaarlutik takutippaat. Taamatut isumaqarput aqutsinermi aaqqissuussaanermilu siunnersortit Heidi aamma Jakob Lindholm.

Taakku isumaqarput, partiimit inatsisinut tunngasuinnaat isummerfigineqarneratigut, tassa Mikael Petersenip pinerluttuliortutut pineqaatissinneqarsimannginnera kisiat isummerfigigamikku taamatut takutitsinerat taatumunnga erseqqissaataavoq.

- Kinguaassiuutitigut innimiilliorneq inatsisitigut immaqa unioqqutitsinerunngikkaluartoq, innimiilliorsimanerit ilungersunartut oqaluttuarineqarput. Mikael Petersenip nammineerluni nassuerutigisimavaa killissaminik qaangiisimalluni. Arnat kanngunarsarneqarsimasutut misigisimanerat tupaallaatigalugu oqaatigisimavaa, siunnersortit oqarput.

Siunnersortit isumaat malillugu, tamatuma takutippaa, taamatut pissusilersortarneq nalinginnaasutut imaluunniit allanneqarsimanngikkaluarluni malittassatut akuersaarneqartoq.

- Taamatut pissusilersortarneq angutit ileqqoraat, suliniaqatigiiffiit inuiaqatigiillu nutaaliaasut sivisuumik akiorniarsimasaat, Jakob Lindholm oqarpoq.

Naleqartitat ileqqorissaarnissarlu pineqartut

Partii Naleqqami kinguaassiuutitigut innimiilliortarnermut tunngatillugu erseqqissumik nalunaaruteqartoqarsimavoq. Ilaatigut partiip sulisunut politikkini nutarsersimavaa, kinguaassiuutitigut innimiilliortarneq qanoq paasisariaanersoq innimiilliorfigineqartumullu qanoq kinguneqarsinnaanersoq pillugi arlalinnik immikkoortortaqartoq.

Partii Naleqqap sulinut politikkianit tigulaakkat

(...) Tiinganiarluni kannguttaatsuliorneq tassaavoq inuup ataatsip imaluunniit inuit amerlasuut uteqqiattumik piffissamilu sivisunerusumi sakkortuumik inuup pineqarnissaminik kissaatiginngisaanik atoqatigiinnermut tunngassutilimmik pissusilersorfiginninneq(...)

Iliuutsit tiinganiarluni kannguttaatsuliornertut ittut imaattuusinnaapput:

Kissaatiginngisamik kuninneqarneq, iviangikkut akulaakkullu attorneqarneq, nulororneqarnerlu

Kissaatiginngisamik atoqatigiinnissaq anguniarlugu oqaaseqaqattaarluni kaammattuineq

Quianaatsumik quiasaarfigineqarneq, oqaatsillu inummut tunngassutillit atorneqarlutik

Atoqatigiinnermut tunngassutilinnik paquminartunik aperineqartarneq

Assinik atoqatigiinnermut tunngasunik nassiussuineq takutissuinerlu

Mikael Petersenili atorfinitsinneqarnera eqqarsaatigalugu, pineqaatissinneqarsimannginnera imaluuniit pinerluuteqartutut unnerluutigineqarsimannginnera pineqartoq, partiimi siuttutut oqaaseqarput.

Ajornartorsiutaasorlu taannarpiaasoq, aqutsinermi siunnersorti Heidi Lindholm isumaqarpoq.

- Partii Naleqqap pisumi matumani ileqqorissaarnissamut naleqartitanullu tunngatillugit isummerusunnginnermigut takutippaa, naleqartitanik ileqqunillu allanik pingaartitsinini. Kinguaassiuutitigut innimiilliorfigineqarsimasut taamaalioqqusinatik oqaaseqarnissaat tamatuma ajoqusersinnaavaa, tamannalu ajornartorsiutaavoq. Ukiut qulit 15-inillu kingulliit ingerlaneranni kinguaassiuutitigut killissamik qaangiillunilu pissusilersortarammanerusumik oqaluuserisaleraluarparput, Heidi Lindholm oqarpoq.

Soqutigineqanngitsutut misigisimasoq

Arnat qulit kinguaassiuutitigut innimiilliorfigineqarsimanerminnik unnerluussisut ilaasa ataatsip paasisinnaanngilaa, Mikael Petersenip taama sukkatigisumik qaffasissumik atorfittaaqqinnera. 

- Eqqarsaaterpassuit misigissutsillu ilunni uteqattaarput. Nutaarsiassaq taanna ikitsinnik ammaaqqippoq, Mari Laursen Sermitsiaq.AG-mut oqarpoq.

Paasisinnaanngilaa, angut kanngutsaatsuliorsimasoq partiimi allami akuerisaanera.

- Eqqarsaatiginngitsoorsinnaanngilara: Misigisimasavut pimoorunneqanngitsut? Kannguttaatsuliortup qanoq innera kisiat qiviassallugu taamak ajornangitsigaa? Inunnguutsivut eqqarsaatigissagaanni, tamatta naligiinnginnatta? Mari Laursen oqarpoq.

Qanoq iliuuseqarsinnaanngitsutut misigisimavoq.

- Partii Naleqqap Mikael Petersenimik atorfinitsitsinermigut oqariartuutaa pakatsiffigalugulu ajuussaarutigaarput. Nunami maani asasatsinni naligiissitaaneq eqqarsaatigalugu nukillaajallannarpoq. Misigisimasavut nuanniitsut ammaallugit allanut tusartippavut. Tamannali allaanngilaq Partii Naleqqamit naleqartinneqanngitsoq, Mari Laursen oqarpoq.

Mattunneqassanngitsoq 

Heidi aamma Jacob Lindholmip erseqqissaatigaat, kinguaassiuutitigut innimiilliorsimasutut unnerluunneqarsimaneq pissutigalugu inauiqatigiinnit mattussisoqassanngitsoq.

- Soorunami Kalaallit Nunaanni suli inooqataallunilu sulisinnaavoq, taamalli qaffasitsigisumik atorfeqarnermut atatillugu, naleqartitanik inuiaqatigiinnut tamanut takutitsiniaraanni, tamanna nunatta ineriartortinneqarneranut ajoqusiisinnaavoq, taakku oqarput.

Innarlerneqarsimasunummi aamma angutinut qanoq iliuuseqarnissamik ilisimasaqartunut tamanut akisssaaffeqarpugut, Jacob Lindholm oqarpoq.

- Angutitut kinguaassiuutitigut innimiilliornermut akerliinissamut immikkut akisussaaffeqarpugut. Siullertut pissutigalugu, tamatuma akuersaarneqarsinnaannginnera. Aappaattut , angutit taamaaliortarnerminnik miserratiginnittut ajoraluartumik ajorluinnartutut isigineqarlersinnaanerat pissutigalugu, taanna oqarpoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER