Aqunneqarsinnaanngitsumik tunillaassuuttoqarnissaa Naalakkersuisut aarlerigigaat
Innuttaasut covid-19-imut ersiutillit angerlarsimaannarnissaannik Naalakkersuisut kaammattuipput. Katerinnerit killilersimaneqartariaqarput.
Upernavimmi Covid-19-imik aqunneqarsinnaanngitsumik tunillaassuuttoqarnissaanut
aarlerinaateqartoq, oqartussat nalilerpaat.
Upernavimmi innuttaasut tunillatsissimanermut ersiuteqarunik angerlarsimaannarnissaat, taamatullu maleruaqqusanik malinninnissaq katerinnginnissarlu Naalakkersuisut kaammattuutigaat.
- Massakkut Nunatta nakorsaaneqarfiata, Peqqinnissaqarfiup, Politiit oqartussallu
allarpassuit, nukissat amerlaqisut, Covid-19-ip tunillaassuunnissata akiorniarneranut
atorpaat. Kisimiillutilli akiuussinnaanngillat. Taamatut suliniuteqarnermi innuttaasut
tamakkiisumik tapersersuinissaat pisariaqartippaa, peqqissutsimut naalakkersuisoq Kirsten L. Fencker tusagassiorfinnut nalunaaruteqarluni oqarpoq.
Angerlarsimaannarit
Upernavimmi sisamat tunillatsissimasut paasineqareerpoq. Kaffellernermi nereqatigiinnernilu peqataasimasut mattusimanissaat, ullullu arfineq-aappassaanni misissortinnissaat, oqartussat kaammattuutigaat. Tunillatsissimasummi katerittuni peqataasimapput.
Innuttaasut tunillatsissimanermut ersiuteqarunik suliartoratik angerlarsimaannarnissaannik, Naalakkersuisut maanna kaammattuuteqarput. Ersiuteqartut peqqinnissaqarfimmut sianeqquneqarput.
- Upernavimmi nunattalu sinnerani innuttaasut tamaasa, ataatsimut suliniummi uani
akisussaaqataaqqullugit qinnuigissavakka. Ataatsimut sammisaqaqatigiittarnerup kiisalu
illoqarfiit nunaqarfiillu akornanni angallannerit ingerlatiinnarneqarnissaat
kissaatigineqartoq paasisinnaalluarpara. Piffissamili massakkutut ittumi, Covid-19-imik
tunillaassuuttoqarnissaanut aarlerinaateqartillugu, angallannerit katersuunnerillu
pisariaqavinngitsut tamaasa pinaveersaartariaqarpagut, Kirsten L. Fencker oqarpoq.