Aqqut takuuk: Terianniaq Svalbardimit Canadamut ingerlaartoq
Teriannissap siorna marsimiilli Svalbardimit Canadamut ingerlaarnera ilisimatuut oqaasertaleruminaatsippaat, tamanna ullormut agguaqatigiisillugu 150 kilometerinik ingerlaarnermut sanilliunneqarsinnaavoq.
Terianniaq suli ataasiliinikuunngitsoq, Norsk Polarinstitutimi ilisimatuut tupaallatsippai.
Taanna Svalbardimi gps-imik nalunaaqutserneqarpoq, ilisimatuullu taamanili ingerlaarnera malinnaaffigisinnaalerpaat. Svalbardimi Spitsbergenimi marsip 26-anni 2018-imi pinngortitamut ingerlatsinneqarpoq, ullut 21-t qaangiuttut Kalaallit Nunaannut pivoq, tassanngaanniillu Canadamut ingerlaarluni.
Teriannissap ingerlaarnera nunap assingani takusassiami, ilisimatuut nalunaarsuummit paasissutissat atorlugit suliarisimasaanni takuuk:
- Aallaqqaammut takusarput upperisinnaanngilarput. Eqqarsarpugut toqusimasoq imaluunniit umiatsiamik angallanneqartoq. Kisianni sumiiffimmi tassani umiatsaqanngilaq, Eva Fuglei, Norsk Polarinstitutimeersoq NRK-mut taama oqarpoq.
Kalaallit Nunaannit Canadamut
Terianniaq 1.994 kilometerinik ingerlaqqippoq, Svalbardimit aallarnerminit ullut 76-iinnaat qaangiuttut Canadami Ellesmere Islandimut pivoq.
Terianniap angalanerata isorartussusaa ilisimatuut tupigusuutiginngilaat, sukkassusaa tupigusuutigaat, tassa ullormut 150 kilometerit missaannik ingerlasarmat.