Aqqusinniornissamut suliaq Sisimiunut attaveqassanngikkallartoq
Kangerlussuarmit Sisimiunut aqquserngiornissamut suliap piviusunngornissaanut suliassarpassuaqartoq tusarniummi atuarneqarsinnaavoq
Aqquserngiornissamut pilersaarummi maanna tusarniutigineqartumi takuneqarsinnaavoq, aqqut Sisimiunut attaveqassanngikkallartoq, tassami pilersaarutitut siullertut sulissutigineqarpoq aqqut Kangerluarsuk Tulliup tungaanut aqquteqassasoq.
- Ilimagineqarpoq Sisimiut eqqaanni imaqarfiup killeqarfia pillugu pissutsit inaarutaasumik erseqqissarneqareerpata Kangerluarsuk Tulliup Sisimiullu akornanni aqqusinniornissaq pillugu ASN-imik nalunaarusiortoqarumaartoq, taamaalilluni Sisimiuniit Kangerlussuarmut aqqutaa tamaat assakaasulinnit ingerlavigineqarsinnaalerluni, tusarniaanermut paasissutissani atuarneqarsinnaavoq.
Taamaattoq 'siunissami takorloorneqarsinnaasumik qanikannersumi nunap ilaani tassani suliassaq aamma naammassineqassasoq ilimagineqarpoq', tassa Kangerluarsuk Tullianit Sisimiunut aqquserngiortoqarnissaa naatsorsuutigineqarpoq.
Taamaattumik Kangerluarsuk Tullermi puttasumik talittarfimmik pilersitsisoqassaaq. Tassanngaannit Sisimiunut umiatsiartoqarsinnaanissaa takorloorneqarluni.
- Angalllassinissani pilersaarutaavoq angallatit type Targatut ittut imaluunniit taassuma assigisai inunnut aqqaneq marlunnut naaatsorsuussat atorneqassasut. Angallatit taamaattut 20-30 knob atorlugu ingerlasarput, taamaalilluni talittarfiup puttasup Sisimiullu Umiarsualivianut aqqut akunneq ataaseq imaluunniit akunnerup aappaa avillugu sivisutigisoq atorsinnaallugu, ilisimatitsissutigineqarpoq.
ATV-nut aqqut
Aqqusineq siullermik ATV-nut ingerlavissatut suliarineqassaaq, ilisimatitsissutaavoq.
- Suliniut tassaavoq ukiut ingerlanerini ineriartortussaq. Aqqusineq siullermik ATV-nut ingerlavissatut suliarineqassaaq, pisariaqartitallu naammassippata 2x3 m-imik silissusilimmik illuttullu 1⁄2 m-imik sinilimmik ujaraaqqanik aqqusinnianngorlugu annertusineqassaaq.
Qaartitsinerit
Ingerlaarfiup ilaani pingasuni qaqqanik qaartiterisoqarnissaa naatsorsuunneqarpoq.
- Katillugit qaqqaq 400 m3-t sinnilaarlugit qaartiterneqassasoq ilimagineqarpoq. Tassunga qaartiterutip 250 kg-p missaa atugassaavoq, paasissutissiissutaavoq.
Ikaartarfimmik aamma sanasoqarnissaa siunnerfiuvoq.
- Ikaartarfik ilusilersorneqarsinnaavoq betoninik sanaatut immikkoortukkuutaartoq sinaatigut paakkarutilik imaluunniit ungaluusalik. Ikaartarfik silissusissavimmisut pilersinneqarsinnaavoq qeqqatigulluunniit immikkoortulerneqarsinnaanngorlugu ATV-nut aqqut aqqutivinngorlugu suanngarneqalerpat. Periarfissaq alla tassaavoq sananeqarsinnaavoq saviminermik ikkussoriaannanngorlugu ilusilersoriikkamik
Aqqusinermi aserfallatsaaliuinermut aputaajaanermullu atortuusiviit annerpaamik pingasut inissinneqassapput, perusuersartarfiit amerlanerpaamik qulit aamma sananeqassallutik.
