Aqqusinermi toqutseriarsimasutut pineqaatissinneqartoq
Arnaq angummik savimmik kapisisimasutut pisuutinneqarnermi kingorna, ukiuni sisamani qaammatinilu arfinilinni pineqaatissinneqarsimasut inissiisarfianniittussanngorpoq.
Arnaq 31-nik ukiulik sapaatip-akunnerani kingullermi Eqqartuussisoqarfik Sermersuumi pisunut 25-nit ikinnerunngitsunut unnerluunneqarpoq, taakkunani toqutseriarsimaneq sakkortunersaavoq.
Tallimanngormat suliami eqqartuussuteqartoqarpoq, arnarlu unnerluutit annerpaartaanni pisuutinneqarpoq. Arnaq ukiuni sisamani qaammatinilu arfinilinni pineqaatissinneqarsimasut inissiisarfianniittussanngortinneqarpoq, unnerluussisoq Nina Jessen, Kalaallit Nunaata Politiivineersoq taama ilisimatitsivoq.
Toqutseriaraluarneq Nuummi juulimi pivoq, tassanilu arnaq angummik 45-nik ukiulimmik savimmik 15 centimeterisut takissusilimmik kapisisimasutut pisuutinneqarpoq. Savimmik kapitinnermini angutip puaata aappaa pullaarpoq, inuuneranullu ulorianartorsiortitsisinnaasumik ajoquserluni.
Ilisimannittup pisup ilaanik takunnippoq, arnallu angut assamigut aattaqartoq tusiattorlu qanoq malissimaneraa oqaluttuaralugu. 31-nik ukiulik politiinit tigusarineqarami toqunnissaanik siunertaqarluni kapisimannginnerarpaa.
Unnerluussisoq naammagisimaarinnittoq
- Arnaq toqutseriarsimasutut pisuutinneqarnera naammagisimaarpara, eqqartuussisoqarfiullu pineqaatissinneqarnissaata sivisussusaanut unnerluussut allagaq malimmagu.
- Suliat peqqarniilluinnartut pineqarput, taakkulu ilungersunartutut isigaagut, Nina Jessen, Sermitsiaq.AG-mut taama oqarpoq.
Pineqaatissiissutip sivisussusaanut tunngatillugu, toqutseriarneq nalinginnaasumik ukiunik pingasunik sivisussusilimmik pineqaatissiissutigineqartartoq, Nina Jessenip nassuiarpaa, ukiunilu sisamani qaammatinilu arfinilinni pineqaatissinneqarneranut, unnerluutinik allanik sakkortuunik pissuteqarnerarpaa – taakkunannga marluk peqqarniitsuliornerit, kiisalu siornatigut pineqaatissinneqarnermit qaammatini arfinilinni inissiisarfimmiittussaanerup amigaataanera.
Inatsisartunut ilaasortaq sioorasaarsimagaa
Unnerluussutit peqqarniinnerusut marluk aappaa nakuusernermut tunngavoq, tassani arnap angut asfaltimi nalasoq tukkarsimaneranut pisuutinneqarpoq. Unnerluussutip aappaa, arnap Inatsisartunut ilaasortamut Messengerikkut sioorasaarinnissimaneranut tunngavoq.
'Arnapalaavaraq taannaqa takunissat. Isateruloornissannut piareersimagit,' 31-nik ukiulik ilaatigut taama Inatsisartunut ilaasortamut allassimavoq.
31-nik ukiulik aamma imigassartorsimalluni biilersimasutut paasissutissanillu peqquserlussimasutut pisuutinneqarpoq.
Arnaq unnerluussutit ilaanni tillinniarnermut tunngasumut pinngitsuutinneqarpoq. Unnerluussisup illersuisullu eqqartuussut akueraat.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...