Nuuk
Aqqusinermi ajutoorneq: Ingerlatitsisoq ajoqusinngilaq
Nuummi politiit maanna misissorpaat pingasunngornermi ualikkut aqqusinikkut angallannermi ajutoorneq kinguneqartinneqassanersoq
Pingasunngornermi ualikkut Nuummi aqqusinermi angallannermi ajutoortoqarnerani biilimik ajoqusernerpaasumik ingerlatitsisoq annerusumik ajoqusinngilaq. Politiit ajutoorneq biilit marluk bussillu akuuffigisaat suli maanna misissorpaat.
Qatserisartut biili ajutoortoq qiortareermassuk biilimik ingerlatitsisoq kaanngartinneqarpoq. Tamatuma kingorna Dronning Ingridep napparsimmavissuanut ingerlanneqarpoq nakorsamillu misissorneqarluni.
Atuaruk: Aqqusinermi ajutoorneq: Qaangeeriarneq ajutoorutaavoq
Anulernissaq eqqaamallugu
- Biilimik ingerlatitsisoq annerusumik ajoqusersimanngilaq. Ambulancet qatserisartulli biilimik qiorsisariaqalersut takullugit tupannarsinnaavoq. Annaassiniartartulli ilumut ajortoqannginnera qulakkeerniarlugu biilimik ingerlatitsisoq Dronning Ingridep napparsimmavissualiaappaat taannalu maanna ajunngilaq, Nuup poliitivini pigaartuusoq Johan Westen Sermitsiaq.AG-mut oqarpoq.
Politiit paasisaat malillugit ajutoorneq pivoq inuinnaat biiliat biilimik siunerminiittumik qaangeriartilluni bussimut Qinngutta tungaanut ingerlasumut apormat.
Bussimik ingerlatitsisoq ilaasullu sisamat tuparujussuaqqanertik pissutigalugu Dronning Ingridep napparsimmavissuani ikiorneqarput. Pisimasoq qanoq kinguneqartinneqassanersoq politiit suli paasiniarpaat.
- Oqareernittut paasiniaanerput suli ingerlavoq. Arlaannilli kinguneqarnissaa ilimanarluinnarpoq. Maanna qujanartumik inunnik annerusumik ajoqusertoqanngilaq naak pisoq sakkortorpasikkaluartoq. Uani takusinnaavarput biilertilluni sillimanissamut anoqarnissaq qanoq pingaaruteqartigisoq qanorluunniit sukkaatsigisumik ingerlagaluaraanni, Johan Westen oqarpoq.