Aqqusineq asserneqarsimasoq: Kranit Sisimiuni uppissimasut
Sisimiuni KTI-p ilinniartuisa ineqarfiisa eqqaani kranit uppissimapput, aqqusinerlu asserlugu.
Kranit angallattakkat, Sisimiuni BJ Entreprisep KTI-p ilinniartuisa ineqarfiinik suliaqarlutik atugaat, ataasinngornermi ullaap tungaani uppissimapput, aqqusinerlu ingerlavissaajunnaarallarlugu.
Aqqusineq Aqqaluartaap Aqquserna Sisimiuni ualeq manna matuneqarallarpoq, biilit kranillit assaatillu kranit uppissimasunik illuartitsiniaaneranni.
Sisimiuni takunnittut arlallit kranit angallattakkat uppittut takusimavaat, sikkilertumillu uppiffiginningajannera aamma takusimallugu.
- Sikkilit sequmiivipput. Qujanavissumik sikkilertoq periataarnermini sikkiliniit aqqarpoq, uppilersullu nalaaniit qimaalluni. Uppiffigitingajalluinnarpoq, takunnittoq Sermitsiaq.AG-mut oqaluttuarpoq.
Takunnittup oqaluttuaraa kranimik ingerlatsisoq tupassimarpasissoq, uppittoqarneranili akornuserpasinngitsoq.
Takunnissimasut naapertorlugit ataasinngornermi nal. 8.30 missaani ajutoortoqarpoq. Sermitsiaq.AG-p paasisai naapertorlugit inunnik ajoqusertoqarsimanngilaq. Sermitsiaq.AG-lli ajutoorneq pillugu politiit oqaaseqartinniarlugit suli utaqqivoq.