Aqqusaarnermi malittarisassat Kalaallit Nunaannut takornariarnianut eqquisut
Danmarkimut isersinnaanermut Københavnimiinnermullu tunngatillugit danskit coronamut malittarisassaat, takornarianut nunanit allaneersuunut, Kalaallit Nunanni sulinngiffeqarniartumut annertuumik ajornartorsiutaalersimapput.
Takornariat nunanit allaneersut Københavnip Timmisartoqarfianut tikikkaagamik danskit coronamut atatillugu malittarisassaannit akornuserneqartarput, tamannalu Kalaallit Nunaanni takornariartitsisartunut ajorluinnarpoq.
Assersuutigalugu ilaqutariit Spaniameersut, Madridimiit Københavnimut timmisartumik tikikkaagamik, Kalaallillu Nunaannut ingerlaqqikkusullutik, Danmarkimi arfinileriarluni unnuinissamut inniminniisimagaanni aatsaat timmisartoqarfimmit qimagussinnaaneq pillugu malittarisassat aporfigisarpaat.
Angalasut nunamut aqqusaartut, arfinileriarlutik unnuinissamut inniminniisimanngikkunik Danmarkimi timmisartoqarfinnit ingerlaqqissinnaanngillat. Takornarianut Kalaallit Nunaanukarniartunut tamanna unammillernartinneqarpoq, tassa timmisartut ingerlaarnissaannut pilersaarut naapertorlugu, Københavnip Timmisartoqarfianut tikinnerup aqanguani Air Greenlandimut ilaalluni nalinginnaasumik ingerlaqqittoqaraluarmat.
- Takornariat nunani allaneersut, timmisartoqarfiup akunnittarfiani unnuk ataasiinnaq unnueqqusaanngillat, pilersaarutit malillugit aqanguani ingerlaqqittussaagaluaraanniluunniit, danskit politiivi hotlinertik aqqutigalugu nunamut isernissamut malittarisassat pillugit Sermitsiaq.AG-mut nassuiaapput.
- Pappialaatinnili takusinnaavara, timmisartoqarfik innarfissanik inissititerisimasoq, aqqusaarlutik angalasunut ikiuiniarlutik, politiini sulisoq politiit hotlineatigut ilisimatitsivoq.
Siniffissat inissaarunneqarsimasut
Københavnip Timmisartoqarfiani tusagassiisarfimmit ilisimatitsissutigineqarpoq:
-Ilumoorpoq Københavnip Timmisartoqarfiani siniffissanik arlalinnik ilioraasoqarsimasoq, taakku covid-19-ip tuniluutilerneranut atatillugu ajornartoornermi timmisartuussisarnernut atatillugu atorsimavavut. Siniffiilli pineqartut piiarsimavavut, Københavnip Timmisartoqarfiani immikkut ilisimasalik Lars Ingstad ilisimatitsivoq.
Timmisartut ajornartoornermi atorneqartartut ikittuinnaat timmisartoqarfimmik atuineranni, sinniiffiit aaqqiissutitut atorneqarsimapput. Ullumikkut timmisartoqarfiup tamakkiisumik atorneqarnerani siniffissat inissaarulluinnarsimapput.
Oqartussat aaqqiissutissarsiortut
Nunanit allaniit Kalaallit Nunaannut angalasunut periarfissatuaavoq, timmisartoqarfimmi issiavimmi natermiluunniit sininnissaq.
- Tamanna Kalaallit Nunaanni takornariartisinermut annertuumik ajornartorsiutaavoq. Kalaallit Nunaanni takornariartitsisartut eqqugaareerput, aqqusaanermilu malittarisassat taakku, nunanit allanit takornariarnianik pilerisaarinissamut periarfissavut ajorseriartippaat, Visit Greenlandimi siunnersortaaneq Tanny Por oqarpoq.
Taassuma ilisimatitsissutigaa, Kalaallit Nunaanni oqartussat Danmarkimi oqartussanut saaffiginnissimasut, tassani takornariat Kalaallit Nunaannut ingerlaqqikkusuttut malittarisassanut ilaatinneqannginngissaat anguniarlugu, oqartussalli suli aaqqiissutissarsisimanngillat.