Aqqip allanngortinnera millionilinnik nalilik
TelePostip aterminik Tusassimut allanngortitsinera Savalimmiuni ussassaarinermik ingerlatsiviup pilersuisullu nunanit allaneersut iluanaarutigaat.
Selskabip namminersorlutik oqartussanit pigineqartup aterminik ilisarnaamminillu allanngortitsinera qanoq akeqarnersoq Tusassip pisortaata Kristian Renert Davidsenip maanna ersersilaarpaa.
Aviisi Sermitsiaq taama allappoq.
Aqqip allanngortinneqarnera akisusimavoq, maannali tikillugu Tusassip qanoq akeqarnersoq oqaatigiumasimanngilaa. Sermitsiap maanna qulaanarpaa tamanna millionilinnik akeqarsimasoq, tamakkualu ilarpassui nunani allani atorneqarsimasut.
- Tamatumunnga aningaasartuutit ilarpaalui nalinginnaasumik ingerlatsinermi aningaasartuutit ilagisimavaat. Tamatumali saniatigut suliffeqarfissuup pilersuisunut nunap avataaneersunut 3,6 millioner koruunit atorsimavai, Kristian Reinert Davidsen Sermitsiamut nassuiaavoq.
- Aqqip allanngortinneqarnerata aningaasatigut akisussaasumik ingerlannissaa pingaaruteqarsimavoq. Taamaalilluni aningaasat amerlanerpaartaat nalinginnaasumik aserfallatsaaliinermit ingerlatsinermillu tigusimavagut. Illuuterpassuagut nutaamik tungujortumik qalipanneqassapput, tamannalu pissaaq qalipanneqartariaqalernerat ilutigalugu, aammalu sumiiffimmi qalipaanermik ingerlatsiviit piffissaqarnerat malillugu. Sulisutta atisaasa taarsernissaat sivisuumik piareersarsimavarput, tamannalu aamma akisuvoq, ukiunilu kingullerni marlussunni ateq Tusass nipaatsumik atornerujartorsimavarput.
Aningaasat nunamit aniatinneqarput
- Aningaasartuutit tamarmik ataavartumik ingerlatsinermut missingersuutinut ilaapput, taamaassimassagaluarporlu aamma ateq allanngortinneqarsimanngitsuuppat. Tusassip aningaasartuutit annertunerusut saniatigut aqqip allanngortinneqarneranut atatillugu pilersuisunut nunap avataaneersunut katillugit 3,6 millioner koruunit atorsimavai, Kristian Reinert Davidsen oqarpoq.
Suliffeqarfinnik nalilersuinerit
Pilersuisunik toqqaanermi Tusassip ingerlatsiviit nunatsinneersut nunanillu tamalaaneersut nalilersorsimavai. Sulisuvut pilersuisullu nunatsinneersut suliassanik arlalissuarnik suliaqarsimapput, suliniummi pingaarnerusutut siunnersorterput, Savalimmiormiut ussassaarinermik ingerlatsiviat Sendistovan, qanimut suleqatigalugu, taassumalu suliniutit nunatsinni suliniummut assingusut arlallit ingerlattareersimavai, aammalu Kalaallit Nunaanni misilittagaqarluni.
Tusass suleqatigiinnikkut tassuunakkut nutaanik misilittagarpassuaqalersimavoq, tamannalu pissutigalugu nammineq nukivut saniatigullu pilersuisut nunatsinneersut atorlugit atertaatta aserfallatsaalinissaanut ineriartortinnissaanullu maanna atortussagissaalersimavugut.
Aviisimi Sermitsiami atuarnerusinnaavutit. Aviisi uani pissarsiariuk: