ujaasineq
Aqqartartut Gudrunimut attuumassuteqarsinnaasumik nassaanngillat
Issittumi Sakkutooqarfiup aqqartartuisa 18-inik ukiulik, Gudrun Sanimuinak ujaaralugu Tasersuarmiissimapput. Taakku aqagu tallimanngornermi misileeqqissasut, Qaqortumi politiit paasissutissiaraat.
Issittumi Sakkutooqarfiup umiarsuaataa ippassaq pingasunngornermi Gudrun Sanímuinamik ujaaseqataajartorluni Qaqortumut tikippoq. Aqqartartut ullumi ullaatungaani Tasersuarmiissimapput sikumik putooralutik, Kujataani politiit paasissutissiipput.
- Ullumi sisamariarlutik aqqaraluarput toraangaqaratillu. Aqagu aqqaqqissapput, politikommisæriungallartoq, Laila Fleischer, Sermitsiaq.AG-mut oqarpoq.
Arpattartoq støvlimik nassaartoq
Naalaatsornerinnakkut arpattartoq sapaatip-akunnerata siuliani Tasersuarmi kamippammik nassaarpoq, taannalu ujaarineqartumit pigineqarnissaa ilimagineqarluni. Kamippammik nassaarnerup kingorna, Issittumik Sakkutooqarfik aqqartartunik marlunnik ikiorsiissalluni aalajangerpoq.
Sapaataalersumi unnukkut ulloq 12. november, Gudrun Sanimuínak periarfeerunneqarpoq. Illoqarfimmi kajumittut arlallit ujaasinermi peqataasimapput.
Aamma atuaruk: Arnap periarfeerunneqartup kamipparigaa nassaarineqarpoq