Aqqartartoq Issittumi ajutoortoq atomip nukinganik ingerlateqarsimavoq
Aqqartartumi ikuallattoorluni ajutoorneq pillugu Ruslandimi oqartussat nipangiusimanninnerannik isornartorsiuineq. Aqqartartup atomip nukinganik ingerlateqarnera maanna aatsaat oqaatigineqarpoq.
Præsidentip Vladimir Putinip illersornissamut ministeriminik ataatsimeeqateqarnermini, russit aqqartartuat atomip nukinganik ingerlateqartoq, ullut pingasut matuma siorna ikuallammat toqusoqarneranik kinguneqartoq saqqummiuppaa.
Aqqartartoq issittumiissimavoq.
Ajutoorneq pillugu oqartussat nipangersimanertik pillugu isornartorsiorneqarput.
Imarsiortut 14-it ajutoornermi toqupput, aqqartartup Issittup eqqaani immap naqqanik misissuinermik ingerlatsinerani tamanna pivoq.
Atomreaktori matoqqasoq
Paasissutissarlu taanna aatsaat Putinip aamma illersornissamut ministeriata, Sergej Sjojgop, sisamanngornermi ataatsimiinneranni saqqummerpoq.
- Atomreaktori aqqartartumiittoq matoqqalluinnarpoq, Sjojgup præsidenti oqaluttuuppaa.
- Reaktori illersorniarlugu qanoq iliornissamut piareersaatit inuttanit atorneqarput, taanna tamakkiisumik ingerlavoq, ataatsimiinnerup kingorna Kremlip videomi nassiussaani ilanngullugu taama oqarpoq.