Aqqaluk Lynge: Danmarkimi tusagassiorfiit Naalagaaffeqatigiinnik sumiginnaapput

Tusagassiorfiit Naalagaaffeqatigiinneq pimoorukkunikku, silassap saqqummiuttarnissaa ilannguttariaqaraluarpaat, IA-mi politikkeriusimasoq ICC-milu siulittaasuusimasoq Aqqaluk Lyge isumaqarpoq, ilaatigullu innersuussutigalugu Candami CBC-p Canadami nunap immikkoortuini tamakkiisuunngitsumik namminersortut silassaannik saqqummiussisarnera.

Aviisip ullormut saqqummertartup Informationip ilisarititsilluni qanittukkut saqqummiussinerani Lynge ilaatigut oqarpoq:

- Suleqisunukua, isumaqarnerlutik silassaq takuniarutsigu CNN imaluunniit BBC isiginnaassagipput…

Kalaallilli Nunaanni silassaq DR-kkut imaluunniit TV2-kkut takutinneqartarnissaa periarfissaqarpallaarunanngilaq.

Sivisuallaassaqaaq

- DR Vejret silasiorfiunani silap qanoq innissaanik saqqummiisarfiuvoq, Kalaallillu Nunaata silassaa tv-kkut saqqummiuttarniarutsigu aallakaatitaq minutsit tallimat, arfinillit sivisunerusulluunniit atorlugit saqqummiunneqartalissaaq. Kalaallit Nunaanni sila, kangianiit kitaanut aamma avannaaniit kujataanut kiisalu immap qaavaniit nunap portunerpaaffiinut assigiinngitsupilussuusarpoq. Tamanna Danmarkimi silap saqqummiuttarnera assigalugu taamak sivikitsigisumik saqqummiunneqarsinnaanngilaq, DR Nyheder, Aktualitet og Distrikter-imi pisortap tullia Anders Kern Boje, silamut tunngatillugu akisussaasoq oqarpoq.

- Kalaallit Nunaat Savalimmiullu Naalagaaffeqatigiinnut ilaanerat eqqumaffigilluarparput, ilaannikkooriarlutalu DR1-imi ’Vores Vejr’ aallakaatikkaagatsigu assit videollu nassiunneqarsimasut atorsinnaasarpavut, Kern oqarpoq.

TV2 aamma nutaarsiassanik aallakaatitsigaangami pilersaaruteqanngilaq, Kalaallit Nunaata Savalimmiulluunniit silassaannik saqqummiussisarnissamut:

TV2-mit danskit pisartagallit ukkatarineqartut

- Kalaallit Nunaannik Savalimmiunillu ulluinnarni ukkataqartarnitta annertusarneqarnissaanut maannakkorpiaq pilersaaruteqanngilagut. Oqaatigissalluguli pingaaruteqarpoq, pingaartumik Kalaallit Nunaat pissusissamisoortumik TV2 Vejret-imit ukiualunnguit matuma siorna eqqumaffigineqarnerulersimasoq, tassa silap allanngoriartornera pissutigalugu, TV2 Vejret-imi aaqqissuisuuneq Peter Tanev oqarpoq.

- Tamtumunnga peqatigitillugu silap maannakkorpiaq qanoq innera apeqqutaalluni aamma/imaluunniit sumiiffinnut allanut tunngassuteqarpat – taakkununna ilanngullugit Kalaallit Nunaannut Savalimmiunulluunniit tunngassuteqarpat – soorunami silap silaannaallu pissussai taakku ilannguttarpavut. Taamaammat Kalaallit Nunaat Savalimmiullu silassamik aallakaatitsigaangatta ilanngutillattaartarpavut.

- På TV 2 Vejret-imi sila ulluinnarnilu silamik atuisut ataqqisupilussuuagut, taamaammat silassaq kikkunnut aamma qanoq saqqummiunneqartarnera eqqummaariffigisarparput. TV-kkut naatsumik saqqummiussisarnitsini isumalluutitta Danmarkimilu isiginnaartoqarnerpaaffigisartakkatsinni silassamut piffissaq atortagassarput ukkatariniarlugit aalajangersimavugut. TV2 isiginnaassallugu akiliuteqarsimasuinnarnit isiginnaarneqarsinnaammat TV2 Vejret Kalaallit Nunaanni Savalimmiunilu aalajangersimasunik isiginnaartoqarsinnaanera killeqarpoq, Tanev naggasiivoq.

Danmarkiki kikkunnut tamanut kiffartuussiviit qulakkiigassaraat, Danmarkimi innuttaasut assigiinngitsorpassuarnik isiginnaagassaqarnissaat aamma fjernsyn, radio, internet assigisaallu aqqutigalugit kiffartuunneqarnissaat, Kultureqarnermut ministeeriaqarfik nittartakkamigut ilisimatitsivoq. Kultureqarnermut ministeeriaqarfiup ilaatigut DR, TV” Danmark A/S aamma najukkani TV2-qarfiit kiffartuussinissamik isumaqatigiissuteqarfigisimavai.

Kalaallit Nunaanni KNR tassaavoq kikkunnut tamanut kiffartuussisussaasoq.