Aqqaluk Lynge: Sorsunneq nillertoq nutaaq takkuteriaannaavoq

Issittoq tassaaqqilersimavoq nunarsuamioqatigiinni pingaarutilittut inissisimasoq, ICCp siulittaasua AqqalukLynge ICCp Inuvimmi ataatsimeersuarnerani marlunngornermi oqalugiarnermini oqarpoq. Issittumut soqutinnileriartorneq sorsunnermut nillertumut assersuuppaa taamanikut sakkutooqarnikkut issittoq pingaarutilittut inissisimammat. Maanna aatsitassat pineqarnerulerput.

Aqqaluk Lynge ICC-mi siulittaasutut kingullerpaamik ammaanermi oqalugiarpoq. ICCp aqqaneq aappassaa ataatsimeersuarnera naggaserlugu siulittaasumik nutaamik qinersisoqassaaq. Aqqaluk Lyngep oqalugiaammini naqissuserpaa issittumi inuit tassaalersimasut nunarsuarmi tusaaniarneqartut pissutsinullu nutaanut naleqqussarsinnaasimasut.

Issittumi eqqissineq
Silaannaap allanngornerata kingorna issittoq soqutigineqaqqilerpoq issittup ilarujussua umiarsuarnik angallaffiusinnaalermat aatsitassallu pillugit pilerineq annertusiartorpoq.

- Avatangiisitta peqqissutsittalu ernumaginissaat pissutissaqarpoq, tamannalu uagutsinnut maani najugaqartunuinnaq atuutinngilaq, nunarsuatsinnili allarpassuarnuttaaq aamma atuulluni, Aqqaluk Lynge oqarpoq

Kingumut qiviarnermi taakkartorpaa sakkutooqarnikkut pissaanilissuit issittumut sakkutooqarnermi atortunik pingaarutilinnik ikkussuisimanerat.

- Oqaluttuarisaaneq ilinniutigalugu kingullertigullu Kangiata Kitaatalu akornanni pissusiulersut qissimillugit, ernummatigineqarsinnaavoq ’sorsunneq nillertoq’ nutaaq pilersinneqalinnginnersoq, kisianni uagut Issittumi najugaqartugut kissaatigalugulu neriuutigaarput Issittoq tassaajuassasoq eqqissinerup nunaa, Aqqaluk Lynge oqarpoq.

Taanna neriuppoq issittumi naalagaaffiit nunat inoqqaavi ataqqiumaaraat sunniuteqaqataatillugit.

Tamarmik akisussaapput
- Issittumi Nutaami Pitsaanerusumilu pingaartuuvoq, Inuit nammineq nunaminni pisuussutitigut ineriartornermik aqutsisuunissaat, ilumuussuseq, ataqatigiissuseq ersarissumillu pissusilersorneq tunngavigalugit, Aqqaluk Lynge oqarpoq.

Issittorlu pitsaasoq inuuffigiuminartoq qulakkeerniarlugu kikkut tamarmik akisussaaqataasut oqarpoq.

- Taamaammat pingaarluinnarpoq meerartatsinnik inuusuttatitsinnillu inuttut ilivitsutut ineriartortillugillu ilinniartitsinissarput, sorlaminnik ilisimannilersillugit, peroriartortillugit, toqqissinartumik silarsuarmullu nutaaliaasumut pilutanissinnaanngorlutik, Aqqaluk Lynge oqarpoq.

Oqalugiaataa qallunaatut, kalaallisut tuluttulluunniit aasinnaavat linkit talerpianittut atorlugit