Aqqaluaq: IA-mi siulittaasutut qujaannarpoq
Aqqaluaq B. Egede Nunatsinni partiit annersaasa aappaanni Inuit Ataqatigiinni siulittaasutut qinigassanngortissanngilaq. Múte Bourup Egede siulittaasussatut sassaqqullugu kaammattuutigaa
Inuit Ataqatigiinni siulittaasoq Sara Olsvig sapaatit akunneri matuma siorna politikkimit peqataajunnaarnerani partii nutaamik siulittaasumik qinersisussanngorpoq. Partiimi siuttuusut ilaat Aqqaluaq B. Egede siulittaasutut qinigassanngortinniarnani maanna tusagassiutinut nalunaaruteqarpoq:
- Inuit Ataqatigiit siulittaasuattut sassarnissara uannut piffissaanngilaq, oqarpoq, itisiliillunilu:
- Taamatut aalajangerninnut aamma patsisaaqataavoq massakkut meeqqakka kisimeeqatigigakkit. Meeqqakkalu politikkimi suliaqarnerma saniatigut piffissaqarfiginissaat uannut pingaaruteqarpoq.
Sara Olsvigip siulittaasuunerani Aqqaluaq B. Egede aamma Múte B. Egede suleqatigiilluartuupput.
- Inuit Ataqatigiinni siulittaasup tulliatut inissisimaninni partiitta naalakkersuinikkut ingerlanerata patajaatsumik pitsaassuseqarluartumillu ingerlanneqarnissaa akisussaaffigaara. Akisussaaffik ulloq manna tikillugu iluarisimaakkannik ingerlasutut nalilerusuppara attakkusullugulu.
Taamatut oqarnermini Múte Bourup Egedep siulittaasutut qineqqusaarnissaa kaammattuutigaa.
Taamaasilluni Múte Bourup Egedep kaammattorneqareermat, siulittaasunngorsinnaanissaa ilimanarsinnaalerpoq.
- Kaammattorneqareernerma kingorna suli eqqarsaatigaara ilumut siulittaasutut qinigassanngortissanerlunga, Sermitsiaq.AG-mut oqarpoq.
Aqqaluaq B. Egede Múte B. Egede pillugu ima oqarpoq:
- Pisariaqarmat Inuit Ataqatigiinni siulittaasup naalakkersuinikkut sunniuteqarluarsinnaasumik, akisinnaasumik, aqutsinikkullu siunnerfinnik nutaanik nassaarniallaqqissuseqarnermik pigisaqarnissaa. Siulittaasuuneq sungiusarfittut atornagu misilittakkatigut inerisimassuseqarnissamik piumasaqaateqarpoq.
Aqqaluaq B. Egede 2014-mi siulittaasunngorniuunnermi Sara Olsvigimut ajorsarpoq.
Inuit Ataqatigiinnut sunniuteqarluartut arlaqartut siulittaasutut sassarniarnatik ilisimatitsisut tassaapput Asii Chemnitz Narup, Ane Hansen aamma folketingimi ilaasortaq Aaja Chemnitz Larsen.
Inuit Ataqatigiit ataatsimeersuassapput decembarip aallaqqaataani Nuup Katersortarfiani. Partiip ukiuni 40-nngortorsiornera aamma tassani malunnartinneqassaaq.