Aqqaluaq B. Egede: Siunissami aalisagartassagut nammineq aalisassavagut
EU-mik suleqateqarneq Naalakkersuisut allanngortinniarpaat, ilaatigut aalisarneq pillugu isumaqatigiissut atorunnaarsinneqassaaq – siunissami.
Kalaallit Nunaat taamaalioqqissinnaava? 1. februar 1985 Kalaallit Nunarput EU-mit (taamanikkut EF) anivoq, taamaalillunilu ukiut aqqaneq marluk sinnilaarlugit ilaasortaareerluni anilluni (Kalaallit Nunaat ilaasortanngorpoq 1. januar 1973 Danmark peqatigalugu).
Aviisi Sermitsiaq taama allappoq.
Kingusinnerpaamik Kalaallit Nunatta EU-llu suleqatigiinnerat nutarterneqarpoq 23. april ukioq manna, tassani peqatigiilluni isumaqatigiissut aqqutigalugu piujuartitsinissaq siunertaralugu aalisarnermut isumaqatigiissusiortoqarpoq, tassanissaaq isumaqatigiissutaavoq ukiuni tulliuttuni sisamani nunatsinni aalisarnerup nutarteriffigineqarnissaa siunertarineqarpoq, kiisalu isumaqatigiissut ukiuni marlunni ilaneqarsinnaasoq aamma isumaqatigiissutaalluni.
Maanna apeqqutaalerpoq suleqatigiinneq isumaqatigiissuteqarfiup naajartornissaata tungaanut qanoq iluseqartinneqassanersoq, suleqatigiinneq atorunnaarsikkiartuaarneqassanersoq imaluunniit nutarterlugu ingerlatiinnarneqarumaassanersoq Naalakkersuisut piffissallu kisimik takutissinnaavaat.
Pisassat angerlaanneqarnissaat anguniagaq nutaaq
– EU nammineq imartatsinni aalisagartassatsinnik aammalu nunat tamalaat imartaanni aalisagartassatsinnik tunisarparput, qaleraliuppata, raajaappata, avaleraasartuujuppata allaappataluunniit aalisakkat tunniuttarpagut. Taakku qanoq naleqarpat? Ilisimasariaqarparput, tassami naluarput assersuutigiinnarlugu EU-mit 250 millioner koruuninik tunineqarutta uagut EU-mut tunniuttakkagut 500 millioner koruuninik naleqarnersut imaluunniit 100 millioner koruuninik taamaallaat naleqarnersut. Suut EU-mik isumaqatigiissuteqarnermi piviusuuppat? Oqallisigalugulu qulaajaaffigisariaqarparput, Aqqaluaq Biilmann Egede avisiimut Sermitsiamut oqarpoq.
– Allali aamma nalilersorneqarsinnaasoq tassunga tunngasoq tassaavoq sinerissap qanittuani aalisartut ilaat avataasiortunngortissinnaanerigut. Avataasiorluni aalisarneq ingerlalluarpoq, sulilu pitsaanerulersinnaavoq, ilaatigut aalisagartassiissutit nunatsinnit nammineq aalisarneqartalerpata, taamaalilluta tamatta iluaquserneqarnitsinnik tamanna malitseqarluarsinnaava?