Aqqaluaq B. Egede: Isumaginninnermut ilinniarnissaq kajungernarnerulertariaqarpoq
Kommunit allaffeqarfiini sullissisut isumaginninnermullu siunnersortit amigaataapput. Ilinniarfissaq suliffiillu kajungernarnerulertariaqartut Naalakkersuisoq isumaqarpoq.
Isumaginninnermi siunnersortitut ilinniarneq isumaginninnermullu ingerlatsiviit suliffittut pilerinarnerulersinneqartariaqarput, isumaginninnermi siunnersortit ilinniarsimasut amerlanerusut tassani sulilersinnaaniassammata.
Meeqqanut Inuusuttunullu Naalakkersuisoq Aqqaluaq B. Egede (IA) taama oqarpoq.
Marlunngornermi januaarip 16-ianni tusagassiortunik katersortitsinermi oqarpoq suleqatigiissitap inuussutissarsiutip kajungernarnerulersinnissaanut periarfissat misissussagai.
- Isumaginninnermi siunnersortinik amigaateqarneq nutaajunngilaq, nunatsinnilu kommunini tallimani isumaginninnermi siunnersortinik amerlanerusunik pisariaqartitsisoqarpoq, naalakkersuisoq tusagassiortunik katersortitsinermi oqarpoq.
Misissuinerit siulii takutippaat kommunini isumaginninnermut siunnersortit suliassarpassuaqaramik ulapputeqarpallaartut.
Akissarsiat qissiminneqarsinnaapput
Taamaattumik Naalakkersuisut suleqatigiissitaliorsimapput isumaginninnermi siunnersortit atugaat misissussallugit. Tusagassiortunik katersortitsinermi isumaginninnermi siunnersortit peqatigiiffiata siulittaasuata Martha Lund Olsenip oqaatigaa kissaatigalugu kattuffik suliamut peqataatinneqarnissaa, taakkumi suliami unammilligassanik ilisimasaqarluarput.
- Sulisartut kattuffiata suleqatigiissitami peqataanissaa soqutigilluinnarparput, soqutiginnittullu suleqatigiissitami peqataarusuttut oqaloqatigisarpavut. Taamaattumik nuannaarutigaara sulisartut kattuffiata peqataanera, soorunamilu tassunga tikilluaqqusaavusi, Aqqaluaq B. Egede Martha Lund Olsenimut akissuteqarluni oqarpoq.
Aammattaaq erseqqissarpaa isumaginninnermi siunnersortit akissarsiaat qaffanneqarnissaat pisariaqarsinnaasoq, qanorli pitsanngorsaasoqarsinnaanersoq oqaatiginngilaa:
- Suliniaqatigiiffiup qanoq inerniliissanersoq takussavarput, taava oqallinneq ingerlateqqissinnaassavarput paasiniarlugu pisariaqarnersoq, imaluunniit inuussutissarsiut pilerinarnerulersinniarlugu allanik iliuuseqartoqartariaqarnersoq, Aqqaluaq B. Egede Sermitsiaq.AG-mut oqarpoq.