Aqqalu J.: Nioqqutissaq laktoseqanngitsut amerlanerusariaqarput
Nioqqutissat laktoseqanngitsut gluteneqanngitsullu akisusinnaasarput. Atassummi Aqqalu Jerimiassenip tamanna allanngortikkusuppaa. Nunanit allanit, Danmarkimiiunngitsoq, nioqqutissanik nioqquteqartoqarsinnaalernissaanik inatsisiliornissamut Naalakkersuisut suliakkerusuppai.
Immuup qalipaa aalatigassaq laktoseqanngitsoq liiterip affaa 26,95 koruunilik. Immuk laktoseqanngitsoq 21 koruunilik.
Nioqqutissallu allat gluteneqanngitsut, soorlu pannakaassianit gluteneqartunit akisunerusut.
Innuttaasut laktosemik glutenimilluunniit sapigaqartut pisiniarfinni nioqqutissanik akisunerusunik qinaasisariaqartarput. Nioqqutissallu piareereersimasut gluteneqariinngikkunik laktoseqareersuusarlutik.
Pisiniartumut akikinnerussasoq
Ulluinnarmi nerisaqarneq ajornannginnerulertikkumallugu, nioqqutissallu pisiarisariaqakkat akikinnerulertikkumallugit, Aqqalu Jerimiassenip (A) Naalakkersuisut peqquniarpai nunanit allanit, Danmarkimiinnaanngitsoq, laktoseqanngitsunik gluteneqanngitsunillu nioqqutissanik nunatsinni pisiniarfinni nioqquteqartoqarsinnaalernissamik ammaassinissamut suliaqassasut.
- Akikinneerarsuusinnaavoq, soorlu USA-miit nioqqutissanik eqqussuinikkut. Aamma nioqqutissaatai uagutsinnit amerlanerupput, Aqqalu Jerimiassen oqarpoq.
- Innuttaasut taama sapigaqassallutik namminneerlutik toqqangarinngilaat. Oqilisaanneqartariaqarput. Inuuniarnikkut pitsaanerusumik periarfissaqarnissaat sulissutigissuarput, Aqqalu Jerimiassen oqarpoq.
Nioqqutissat pillugit paasissutissat allattorsimaffianut inatsit
Pisiniarfinni nioqqutissat akuisa allattorsimaffiat danskisut allaqqassasoq maanna malittarisassaqarpoq. Inatsit taanna allanngortinneqartariaqarpoq, nioqqutissat akuisa allattorsimaffiat paasissutissallu allat oqaatsit allat atorlugit naqinneqarsimagaluarpataluunniit, nunatsinni nioqqutigisinnaaqqullugit, Aqqalu Jerimiassen isumaqarpoq.
- Nioqqutissat amerlanerulerpata, nioqqutissat akitigut aamma unammillersinnaanerulissapput. Pisiassat sapigallit pisiarisinnaasaat amerlanerulertikkumallugit, taamatullu akitigut unammillersinnaanerulertoqartikkumallugu, aalajangiiffigisassatut siunnersuusiorniarpunga, Atassutip siulittaasua Aqqalu Jerimiassen Sermitsiaq.AG-mut oqarpoq.
Aqqalu Jerimiassenip aalajangiiffigisassatut siunnersuutini Inatsisartut ukiakkut ataatsimiinnerani saqqummiussassanngorlugu suliaraa. Aalajangiiffigisassatut siunnersuummi Naalakkersuisut peqquneqassapput nioqqutissat akuisa paasissutissartai danskisut allassimanngikkaluartulluunniit nunatsinni niuertarfimmi nioqqutigineqarsinnaasunngorlugit, inatsimmik suliaqassasut.
Naalakkersuisunit inatsimmik siunnersuusiaq aappaagu saqqummiunneqartussanngorlugu, Aqqalu Jerimiassen siunnersuuteqassaaq.