Aqqalu Jerimiassen Atassummi siulittaasunngorpoq
Aqqalu Jerimiassen aamma Paninnguaq M. Kruse innersuunneqarnermit kingorna siulittaasussatut sassarput, Aqqalu Jerimiassenilu partiimi siulittaasutut qinerneqarluni.
Piffissaq kingulleq atorlugu Qulutannguaq Berthelsenip Paninnguaq M. Kruse partiimi siulittaasussatut innersuuppaa, taannalu akuersivoq.
Tupaallannanngitsumilli Aqqalu Jerimiassen 16-init taaneqarluni siulittaasunngorpoq, Paninnguaq M. Kruse arfinilinnit taaneqartoq.
Maanna siulittaasuujunnaartup, Siverth K. Heilmannip Aqqalu Jerimiassen siulittaasussatut innersuussimavaa.
- Siornatigut oqaatigereernikuuara Aqqalu Jerimiassen Atassummi siulittaasussatut piukkullugu. Aqqalu Jerimiassen sulinermini takutippaa, sullarissuulluni anguniagaqartaraangamilu sulilluartarluni. Tamanna partiitsinnut iluaqutaavoq, Siverth K. Heilmann partiimi siulittaasussamik nutaamik qinersinnginnermi najuuttunut oqalugiarpoq.
- Maanna Atassut taama inissisimanerani, tamatta nalunngisatsitut unammillingassarpassuaqarsimavoq. Pingaarnerpaarli massakkut tassa takorluugaq ataaseq, siunnerfik ataaseq. Atassutaassagaanni, siulittaasuussagaannilu, pingaarnerpaajuvoq katersuutsitsinissaq. Uanga assaga ilissinnut isaappara suleqatiseralusilu, upperigakku partii siumut ingerlariaqqissaguni, aalajangertariaqalertoq, kina siuttorissanerlugu. Atassut siumut ingerlasariaqalerpoq. Atassut ataatsimoorfiussaaq. Upperaara ilissi peqatigalugi, ingerlaqqissinnaallunga, Aqqalu Jerimiassen qineqqusaarnermini oqarpoq.
Paninnguaq M. Kruse Qulutannguaq Berthelsenimit innersuunneqareernerminit siulittaasussatut aamma sassarpoq.
- Attortissutigivara siulittaasussatut tatigineqarama. Partii sullikkusuppara, partii suleqatigalugu. Apeqqutini pingaaruteqartuni, qinerneqassaguma piareersimavunga partiimi ilaasortat isumasiortarnissaannut, Paninnguaq M. Kruse oqarpoq.
Politikkikkut misilittagalik
Aqqalu Jerimiassen politikkikkut misilittagaqarpoq, Inatsisartuni kommunalbestyrelsenilu qinersinerni ilaasortanngorsimavoq. Naalakkersuisunilu nukissiuuteqarnermut inuussutissarsiuteqarnermullu naalakkersuisuusimalluni.
Ulluinnarni aqutsisut siulersuisuunerillu ima inissipput:
Aqqalu Jerimiassen, siulittaasoq
Nikolaj Rosing, siulittaasup tullia
Aqqaluk Heilmann, ingerlatsinermi isulittaasup tullia
Emma Lennert, ulluinnarni aqutsisuni ilaasortaq
Knud Kleemann, ulluinnarni aqutsisuni ilaasortaq
Henrik Ottosen, siulersuisuunerni ilaasortaq
Klaus Frederiksen, siulersuisuunerni ilaasortaq
Malu Ostermann, siulersuisuunerni ilaasortaq
Ulluinnarni aqutsisuni marluk aamma siulersuisuunerni aqutsisuni marluk sinniisussatut aamma qinerneqarput.
Partii sapaammi ataatsimeersuarneq nangillugu, partiip siunnerfii pillugit ataatsimeersuassaaq.