Aqqalu Jeremiassen: Suliffeqarfinnut nutaanut periarfissaqalersitsisoq

Saniatigut 220 millionit koruuninik aningaasaliissuteqarnerup inuussutissarsiortut namminersortut ineriartortinneqarnerat nukittorsassavaa, inuussutissarsiornermut naalakkersuisoq naliliivoq.

Trine Juncher Jørgensen

Walter Turnowsky

tallimann 15. mar 2019 06:56

Naalagaaffik aamma Namminersorlutik Oqartussat ataatsimut katillugit 220 millionit koruuninik Greenland Venturemut aamma Vækstfondenimut kalaallit suliffeqarfiinut aningaasaliinissamut aamma taarsigassiisarnissamut aningaasaliissuteqarput.

Suliniutit pingasut nukittorsaassapput

Isumaqatigiissummi immikkoortut pingaarnerit:

Aningaasaleeqataassutinik akiliuteqarneq 200 mio. koruuninik annertussusilinnik Greenland Venture-imut aamma Ineriartortitsinermut Aningaasaateqarfimmut – Vækstfonden, Kalaallit Nunaanni suliffeqarfinnut siuariartornissamut periarfissaqartunut aningaasaliinermut atorneqassapput. Aningaasaliinerit taarsigassarsisitsinertut, qularnaveeqqusiinertut, akiliussisussamaataanertut, aningaasaleeqataanikkut assigisaattullu ilusilimmik Kalaallit Nunaanni suliffeqarfinnut aningaasaliinerusinnaapput.

Suliniutinik inerilluartitsinissamut aningaasaliissutit ataatsimoortut 20 mio. koruuninik annertussuseqartut, suliniutit arlallit inerilluartinnissaannut atorneqartussat, taamaalillunilu suliffeqarfiit aningaasaliiffigineqarnissamut piareersimasut amerlanerulersinneqassallutik.

Siuariartortitsinissamut qularnaveeqqusiinerit. Vækstfonden Kalaallit Nunaanni Siuariartortitsinissamut qularnaveeqqusiinissamut periarfissaqalissaaq, assersuutigalugu sanaartornermut annertunerusunut aningaasaliinernut, suliffeqarfinnut angisuunut, aatsitassarsiorfinnut il.il. aningaasaliinernut.

Katillugit 220 mio. koruunit inuussutissarsiornermi suleqatigiinnermut immikkoortinneqarput, taakkunannga katillugit 22 mio. koruunit Namminersorlutik Oqartussanit aningaasalersorneqassallutik aammalu 198 mio. koruunit naalagaaffimmit aningaasalersorneqassallutik.

Isumaqatigiissut siorna septembarimi mittarfiit pillugit aningaasaliinissamut isumaqatigiissummut immikkoorluni attuumassuteqarpoq.

Ullumikkullu inuussutissarsiornermut naalakkersuisup, Aqqalu Jerimiassenip (A) aamma inuussutissarsiornermut ministerip Rasmus Jarlovip (K) isumaqatigiissut atsiorpaat, taanna Namminersorlutik Oqartussat aamma naalagaaffiup aningaasaliissutaanut aalajangersaasuuvoq.

- Kalaallit Nunaanni inuussutissarsiornerup ineriartortinneqarnissaanut 220 mio. koruuninik aningaasaliinissaq pillugu isumaqatigiissuteqarneq, Kalaallit Nunaanni aallarnisaanernik aamma inuussutissarsiutinik nutaanik ineriartortitsinissamut Naalakkersuisut suliniuteqarnerannut annertuumik pitsanngorsaataavoq, Aqqalu Jerimiassen tusagassiuutinut nalunaarummi oqarpoq.

- Ukiuni kingullerni tunisassianik ineriartortitsinermut tapiissuteqartarnikkut suliffeqarfippassuarnut namminersortunut avammut nioqquteqarnissamut tapersiisarnikkut, ilaatigut sermimut imermullu, takornariartitsisarnermut il.il. suliassaqarfiit iluanni inuussutissarsiutinik nutaanik ineriartortitsinikkut, Naalakkersuisut inuussutissarsiutinik siuarsaanermik annertuumik ingerlataqareerput. Aningaasaliissutit ataatsimoortut 220 mio. koruuninik annertussuseqartut suliffeqarfinnut namminersortut inuussutissarsiutinik nutaanik ingerlataqarneranni peqataarusuttunut annertuumik periarfissaqalersitsisussaapput.

Nunatsinni ineriartortitsinissamut 220 millionit koruunit inissipput

Rasmus Jarlovip aningaasat inuiaqatigiinni atorneqarnissaat aamma qilanaaraa.

- Greenland Venture aamma Vækstfonden isumaqatigiissut manna tunngavigalugu Kalaallit Nunaanni aningaasaatinik annaasaqaataasinnaasunik aamma aningaasaliinernik pissarsinissamut periarfissat nukittunerusumik aamma pimoorussisumik nukittunerulermata nuannaarutigaara.