Aqqa S.: Suluusalinnut mittarfiit angallannermut inerisaataasinnaapput

Kommune Qeqertalimmi kommunalbestyrelse kommunip ukiuni qulini tullerni ineriartortinnissaanut pilersaarusiorluni suliamik aallartitsilerpoq.

Kommunalbestyrelsemi ilaasortaq Siumullu gruppiani siulittaasup Aqqa Samuelsenip illoqarfiit ineriartortinnissaanut pilersaarutit Naalakkersuisut sumiiffinni pilersaarutaannut ataqatigiissasut isumaqarpoq. Pingaartumik silaannakkut angallanneq eqqarsaatigalugu.

Aqqa Samuelsen (S) isumaqarpoq Qeqertarsuarmi, Qasigiannguani Kangaatsiamilu ujaraaqqanik qallersorsimasunik mittarfiliornissamut pilersaarutit aningaasalersornissaannut Inatsisartut suleqataasariaqartut.

- Kommunip iluani angallannikkut atortulersuutitigut pitsanngorsaasoqarnissaa Kommune Qeqertalimmi kommunalbestyrelsimi sulinitsinni Siumut gruppiata pingaartitaasa ilagivaat. Qasigiannguani, Qeqertarsuarmi, Kangaatsiamilu suluusalinnut mittarfinnik pilersitsisoqarnissaa Naalakkersuisut Inatsisartullu suleqatigalugit anguniarusupparput, Aqqa Samuelsen tusagassiorfinnut nalunaaruteqarluni allappoq.

Taanna kommunemi politikeritut siulliunngilaq suluusalinnut mittarfiliortoqarnissaanik pilersaarutinik ujartuisoq. Kommune Kujallermi illoqarfinni arlalinni taamatut sanaartortoqarnissaa kujataani politikerip aamma siornatigut oqaatigisimavaa.

Illoqarfiit pingasut

Aqqa Samuelsen Sermitsiaq.AG-mut itisiliinermini oqaatigaa Siumut gruppia mittarfissat tungaanut aqqusinniornissamut ukiuni qulini tullerni pilersaarusiornermut aningaasanik illikartitsisinnaanermut piareersimasoq, Naalakkersuisut Inatsisartullu mittarfinnut pilersaarutiminnik aallartitseqqissappata.

- Aqqusinniornissamut ukiut tamaasa pilersaarusiortarpugut. Mittarfiliortiternissamullu pilersaarutit qaqeqqinneqarsinnaasuuppata, ukiuni tullerni qulini pilersaarutinut mittarfinnut aqqusinniornissat aningaasanut missingersuutinut ilanngunneqartalissagaluarput, Sermitsiaq.AG-mut oqarpoq.

Aqqa Samuelsenip naatsorsuuppaa illoqarfimmut ataatsimut mittarfiliornissamut 100 milliuunit koruunit sinnerlugit akeqartassasoq.

Angallanneq takornariallu

Ujaraaqqanik qallersukkamik mittarfik, timmisartunit suluusalinnit miffigineqarsinnaasoq Kulusummi atorneqarpoq. Mittarfiillu taama ittut qineqqusaarnerni siornatigut aamma oqallisaangaatsiartarsimapput.

Kommunalbestyrelsemi ilaasortap oqaatigaa mittarfiliortiternissamut pilersaarutit piviusunngortinniarneqassappata Inatsisartunit tamanna taperserneqaqqaartariaqartoq.

Mittarfiit anginerit marluk sanaartorlugit ingerlanneqarnerani, nunap iluani angallannikkut pilersaarusiorneq annertusartariaqartoq, taanna isumaqarpoq.

- Taamaalilluni angallannermi atoruminarnerusumik suluusalinnut mittarfeqalerutta nunatsinni innuttaasunut aammalu takornarianut kommunerput tikikkuminarnerulissaaq. Ilulissani Nuummilu mittarfissuit sanaartorneqarnerannut atatillugu nuna tamakkerlugu angallannikkut ataqatigiinnerusumik siammasinnerusumillu periarfissanik aaqqiisoqarnissaa pisariaqarpoq, Aqqa Samuelsen oqarpoq.