Skip to main content

Aqqa Samuelsen politikkimut uteqqikkusuttoq

Nuna tamakkerlugu komminimilu IA sinnerlugu politikkeriusimasoq Aqqa Samuelsen atuarfimmi pisortatut suliffittaarsimanini pissutigalugu qaammatialunnguit matuma siornatigut politikkeriujunnaarpoq. Maannali Siumut sinnerlugu - kommunimut qinigassanngortinniarluni nalunaarsimavoq.

Aqqa Samuelsenip politikkeriujunnaarnera sivikippoq, taanna oktobarip qaammataani nuna tamakkerlugu kommunimilu politikkeritut tunuarpoq, Qasigiannguani atuarfimmi, Juunarsip Atuarfiani pisortanngorami. Taamanikkut tamanna imatut tunngavilersorpaat:

- Pisortanngorninnut atatillugu politikkikkut tunuarninnut pissutaanerpaavoq, atorfittaanni
politikkikkut sumulluunniit attuumassuteqannginnissaq pingaartikkakku,
apeqquserneqarsinnaassanngimmallu.

Siumulli sinnerlugu politikkerinngorlaap tamanna ajornartorsiutitut isigiunnaarsimavaa.

- Piffissap ingerlanerani atuarfiup qanoq aqunneqarnissaa pissutsillu qanoq immikkoortinneqarsinnaanersut ilikkarneqartarput. Maanna politikkimut nukissaqalerpunga, aamma atuarfimmi pisortaajutigaluni kommunimut qineqqusaarnissaq ajornartorsiutaanngilaq, Aqqa Samuelsen politikkimut uternini pillugu Sermitsiaq.AG-mut oqarpoq.

Arlaannaannulluunniit attuumassuteqannginnissaq eqqumaffigigaa

Taassuma erseqqissaatigaa, atuarfimminni atuartut kisiisa pinnagit kommunili tamaat pillugu sassarluni.

- Suliat Juunarsip Atuarfianut toqqaannartumik attuumassutillit suliarineqassappata, soorunami atuarfimmut attuumassuteqarpallaarnera pissutigalugu aalajangiisoqarniarnerani anisassaanga, taanna neriorsuivoq.

Aqqa Samuelsenip politikkikkut siunnerfimminik allanngortitsisariaqalersimanini aamma eqqarsaasersuuterpassuaqartarnermigut sooq IA sinnerlugu pinnani Siumut sinnerlugu sassarnini imatut nassuiarpaa.

- Siumut nutaanik anguniagaqalersimavoq aamma tapersersorsinnaasannik kinguaariit nikitsitilersimapput. Erik Jensen attaveqarfigilluartarlugulu suleqatigilluartarsimavara. Aamma naatsorsuutigaara Siumumi ilaasortat allat suleqatigilluartarumaarlugit, taanna oqarpoq.

Borgmesteritut atuuffik tigusinnaagaa

Aqqa Samuelsen qinersisartunit tapersersorneqarluassaguni akisussaaffimmik annertuumik tigusinissaminut piareeqqanerarpoq.

- Qinerisisartut isumaqarpata bormesterinngissusasuga, taava akisussaaffiup tamatuma tigunissaanut piareeqqavunga, tamannali uanga aalajangingassarinngilara, taanna oqarpoq.

Iliuuseqarfigissallugit anguniagaasa ilaginiarpaat, inuussutissarsiutinik aallartitsisoqarnissaa aamma isumaginninnermut atuarfeqarnerullu iluini suleqatigiinnerup nukittorsaaffiginearnissaa. Atuarfimmi pisortatut maluginiarsimavaa, meeqqat immikkut ittumik pisariaqartitallit ukiukilliartortut, tamannalu iliuuseqarfiginiarsariniarpaa.

- Meeqqat siunissamut inerlatitassata qanoq ittuuneri takusariaqarpavut, Aqqa Samuelsen oqarpoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER