Aputip sisoornerani ajunaangajattoq
Arnannguaq Nuup nunataani aputip sisoorneranit matoorussaagaluarpoq. Poorskikkut nalaanni qaqqaliartussat aputip sisooratarnissaanut mianersoqquai, assaasinnaanermullu atortunik nassaqqullugit kaammattorlugit.
- Nalunngilara akisusut, kisianni aputip sisoornerani atortorisinnaasassinnik qaqqaliartigasi piseqqaaritsi. Inuunermik annaassisinnaapput.
Arnannguaq 41-nik ukiulik taama oqarpoq. Taassuma kingulianik saqqummiukkusunngilaa. Arnannguaq sapaatiummat asimiitsilluni apummit sisoortumit matoorunneqarpoq, nammineerlunilu assalluni aniguisinnaasimalluni.
Sakkortuumik pisoqarnerata kingorna suli sunnerteqqangaatsiarpoq, isumaqarporli oqariartuutissani pingaaruteqarluinnartoq. Taassuma kissaatiginerpaavaa kinaluunniit namminermisut misigisaqassanngitsoq.
Sila alianaatsoq
Arnannguaq sapaatiummat silagitsillugu qaqqami kisimiilluni pisuttuassalluni aalajangerpoq. Ukkusissaq unnukkut pisuttuarfigissallugu nuannarisarpaa, ullorli taanna ulluunerani suli seqinnertillugu pisuttuarusuummerpoq, ullut tulliini silarluttussaasoq ilisimagamiuk. Taamaammat ikinngutini aperaa Nuup illuatungaanut umiatsiamik ikaarussinnaaneraani. Ikaarunneqareerluni asimi kisimiilluni pisuttualerpoq.
Qanngorpallak
Qamuteralannik angallaffiusoq tikikkamiuk nammineq sillimaniarnissani kisiat eqqarsaatigiinnarnagu, aamma qamuteralannik angalasut isumannaannissaat eqqarsaatigisariaqalerpaa. Taamaammat aqqut imminermut isumannaannerusorisani aqqutigilerpaa, qamuteralattunik akornusersuisinnaajunnaarluni.
- Ingerlalaaginnarlungali aputip iluaniit akisuarpalummik tusaasaqalerpunga. Tupappunga, qeqqiinnarlungalu qummut qiviarama takulerpara aputerujussuit tungiinnannut sisoortut, oqaluttuarpoq.
Akunnerup aappaa avillugu aputip iluaniittoq
Arnannguaq soorunami arpalluni qimaariaraluarpoq, aputilli sisoortup imaaliallaannaq poorpaa. Ilisimanngilaa aqqutaani ilisimajunnaarsimanerluni, namminermi naatsorsorniarsaraa aputip oqimaalluinnartup sakiaaniit qummut minutsini 40-ni qalleqqangaani.
Oqarasuaatini angallattagaq annaavaa, aqaguanili allat nassaaraat. Oqarasuaatini angallattagaq uuttuusiullugu takusinnaavaa akunnerit aappaa avillugu apummi matoorussaaqqagimalluni, nammineerluni assaalluni aninguinnginnermini.
Tillernersiut
Oqarasuaat angallattakkami tillernersiutaani takusinnaavaa toqungajalluinnarsimalluni. Ilimagisamit toqungajannerusimalluni. Aputip sisoortumit iluatsitsinerujussuarmini ajunaarani aninguisimasinnaasimavoq.
- Misigisaq ajoruttormat amiilaarnaruttormallu kikkulluunniit pisuttuarniartut apummik sisoortoqartillugu annassutissanik atortussianik piseqqullugit kaammattorusuppakka, Arnannguaq oqarpoq.
Allaaserisaq tamaat AG-mi poorskip kingorna atuarsinnaalissavat.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...