Aputip sisoornera: Najugaqartut angerlarsinnaapput

Qaqortumi ilaqutariinnut ippassaq aputip sisoornerani eqqugaasunut nutaarsiassatsialaqarpoq.

Illuminnut maanna angerlarsinnaanngorput.

Kommune Kujallermi upalungaarsimasut apummik sisoortoqaqqinnginnissaa anguniarlugu aatsaannguummat annertunngitsumik qaartitseqqammerput.

- Qaartitsineq ingerlalluarpoq, apummik sisoortoqalaarpoq, Kommune Kujallermi teknikkikkut pisortaq, Mike Kristiansen oqaluttuarpoq.

- Politiit aamma Upalungaarsimasut sumiiffik qimaqqammerpaat.

Ippassaq nalunaaqutaq 17.30 missaani aputip sisoortup illut sisamat eqqorpai, tassanilu najugaqartut qimagussortinneqarput.

Inunnik ajoqusertoqanngilaq, illut annerusumik ajoqusersimanngitsut kommuni naliliivoq.