Aput sisoorsinnaasoq qaartinneqassaaq
Qaartitsinerup kingorna ilaqutariit angerlarsinnaanerat neriuutigineqarpoq.
Qaqortumi apummik sisooqqittoqannginnissaa anugniarlugu, ullumi ualimut annertunngitsumik qaartitsisoqassaaq. Kommune Kujallermi teknikkikkut pisortaq, Mike Kristiansen taama oqaluttuarpoq.
- Sinneruttoq taamaaliornikkut sisuteriarniarparput. Annerpaartaa sisoreernikuuvoq, taanna Sermitsiaq.AG-mut oqarpoq.
Illut sisamat aamma biilit marluk Hastrupvejip aamma Peter Høegsvejip eqqaani apummit sisoortumit eqqorneqarput. Inunnik ajoqusertoqanngilaq. Najugaqartullu qimagussortinneqarput.
- Qaartitsereerutta ilaqutariit angerlarsinnaanissaat neriuutigaarput. Kisianni tamanna kingorna nalilerumaarparput.
Illut ajoqusersimasinnaanerat suli paaseqqissaarneqanngilaq, aputaajarneqarnerat suli naammassinngimmat.
- Maannamut annerusumik ajoqusersimanernik paasisaqanngilagut, Mike Kristiansen oqarpoq.
Qaartitsineq pissusissamisut pissagaluarpalluunniit suli navianarnera qaanngiutivinnavianngilaq. Tassami sumiiffinni allani aput sisusinnaasoq kommunip paasivaa.
- Sumiiffinni pineqartuni allagartalersuileruttorpugut.