Aput anorilu timmisartukkut angallassinissamut akornutaasut
Air Greenland kitaata sineriaani anorleraluaqisoq aputeqaraluaqisorlu ullaarnaniit timmisartuussisinnaasimavoq. Taamaakkaluartoq aamma ullaaq manna taamaatitsiinnartoqartarlunilu kinguaattoortoqartarpoq.
Anorlingaatsiarneranit timmisartukkut angallassinissaq akornusersorneqarpoq, sulili timmisartuussinissanik taamaatitsiinnartoqanngilaq, Air Greenlandip nittartaagani tamanna takuneqarsinnaavoq.
Ullaaq nalunaaqutaq 6.45 Nuummiit Kangerlussuarmut ingerlaartussaq taamaatiinnarneqarsimavoq, timmisartorlu ataaseq utertariaqarsimalluni – perserneranit pissuteqartumik isikkivilunnera pissutiginnguatsiarlugu. Timmisartut arlallit kinguaattooqqapput, taamaammat timmisartortitseqatigiiffiup nittartagaa malinnaavigeqquneqarpoq.
Tasiilami anorersuartoq
Tasiilami Piterarsuaarpoq, DMI-p kingullermik silasiorsimaneranit tamanna takuneqarsinnaavoq:
- Tasiilami piterarpoq, avannaata kitaanit anorersuannguuttartumik anorsarissaaq, anoreruartut sakkortutigisumik anoraasuasarluni, ullorornerani sakkortunerpassaaq. Unnummut anorikkilliartussaaq unnuarulu avannaata kitaanit sakkukitsumik anorsaannguassalluni. Erseqqarinnerussaaq seqinningaatsiarluni. Ulloq naallugu 8 aamma 12 gradit akornanni ississaaq.
DMI Aasianniit kujammut silassaq pillugu ima allassimavoq:
- Kitaata sinnerani Kujataanilu ullup sinnerani unnuarulu nittaallertarluni nuiassaaq. Kujataata kangianit kujataaniilluunniit anorsaassaaq sakkortuumilluunniit anorlerluni, unnuaru sakkukilliartortussamik. 6 aamma 14 gradit akornanni ississaaq, kujasinnerusumi unnuaru 3 aamma 10 gradit akornanni ississalluni.