Apriilimi timersortoqassanngitsoq: Kalaallit Nunaanni Timersoqatigiit Kattuffiata atorunnaarallartitsineq sivitsoraat
Kalaallit Nunaanni Timersoqatigiit Kattuffiat aalajangersimavoq, illup iluani silamilu timersornissamik aaqqissuussat atorunnaarallartinneqarnerat sivitsorneqassasoq. Atorunnaarallartitsineq apriilip qaammataa ilanngullugu atuutissaaq
Arsaq uninngavoq.
Ketsjeri suli sikaavimmiittariaqarpoq.
Kalaallit Nunaanni Timersoqatigiit Kattufgfiata sungiusaqatigiinnaveersaarnissaq suli kaammattuutigaa.
Illup iluani silamilu timersornissamik aaqqissuussat tamarmik suli uninngatikkallarneqartariaqarput. Taamatut isumaqarpoq Kalaallit Nunaanni Timersoqatigiit Kattuffiat, atorunnaallartitsinermik qaammaammik ataatsimik sivituisimasoq.
- Kalaallit Nunaanni Timersoqatigiit Kattuffianit, oqartussanit innersuussutit, piumasaqaatit maleruaqqusallu tapersersorluinnarpagut, pingaartumik Tuniluuttumik nappaalanersuaqarnerani ataatsimiititaliarsuup innersuussutai. Timersoqatigiit Kattuffiinut timersoqatigiit peqatigiiffiinullu, Kalaallit Nunaanni Timersoqatigiit Kattuffianit nalunaarutigissuarput timersorneq aqqutigalugu najungaqarfigisami, nunap immikkoortuini nunalu tamakkerlugu aaqqissuussani 2020-mi apriilip qaammataata naanissaata tungaanut atorunnaarallartitsinissaq, Kalaallit Nunaanni Timersoqatigiit Kattuffiani siulittaasoq, Nuka Kleemann oqarpoq.
Timersornermik aaqqissuussat tamarmik, sisorarluni Kalaallit Nunaanni pissartanngorniunnissamiit illup iluani futsalimik Kalaallit Nunaanni pissartanngorniunnissamut coronavirusip tuniluussinnaanera pissutigalugu taamaatiinnarneqarsimanngikkunik kinguartinneqarsimapput.
Kalaallit Nunaanni Timersoqatigiit Kattuffiannit erseqqissaatigineqarpoq, atorunnaarallartitsinerup kingunerisaanik pisussatut pilersaarutaareersut eqqorneqarsinnaanerat paasisinnaallugu. Peqatigitilluguli kaammattutigaat, nammineq piumassutsimik aaqqissuussat tamarmik qaammammi aggersumi atorunnaarallartinneqassasut, tusagassiorfinnut nalunaaruteqarnermi oqaatigineqarpoq.