Appat pillugit nutaamik ilisimasaqalertitsisumik allaaserisani illersoraa

Appat inaasa eqqaanni aallaammik igittoqaraangat appat qanoq qisuariartarpat? Aamma appat imaatigut angallattut nipiliornerannit qanoq akornuserneqartigisarpat?

Pinngortitaleriffimmi ilisimatusartup Aili Lage Labansenip p.hd.-tut allaaserisamini, sapaatip akunnerani matumi illersorsimasamini, apeqqutit misissorsimasaassa taakku ilagaat. Appanniartarnermik killilersuinerit sakkutorsiartoaraluartut appan ineqarfii ikiliartuinnavipput. Taamaammat allat suut appanut sunniuteqartarpat??

ilisimatuutut allaatigisaqarnermigut piorsaaqataavoq ilisimatuussutsikkut piujuartitsiniartumik uumassuseqartunillu atuinissamut uumasoqatigiiaallu assigiinngiiaassuseqarnerinut iluaqutaasussanik suliaqarnermigut, Pinngortitaleriffimmit tusagassiorfinnut nalunaarummi allassimavoq.

Allaaserisani qulequtsersimavaa imatut, 'Makin´ some noise – A study of anthropogenic threats to thick-billed murre (appa, Uria lomvia) in Greenland'.

Aallaasersorfioqqusaanngitsut malunnaatilimmik annertusineqartariaqartut

Ilisimatusarnermini nipiliortoqartarnera arlaleriarluni sammisarsimavaa. Aili Lage Labansen ilisimatusartunik allanik peqateqarluni, appat inaasa eqqaanni aallaammik igittoqaraangat appat qanoq sunnerneqartarnersut misissuisimavoq.

Misissuinermi inerniliussimavaa, piaqqiorfiit eqqaanni igittoqarsinnaaneranut aaqqiissutaasinnaasunik Kalaallit Nunaanni inatsit amigaateqartoq. Misissuisimanerummi takutippaa, appat eqqartoqarneranit akornguserneqartartut, appallu ilaasa piaqqatik nassarlugit ineqarfimmit allamut nuuttartut.

Ullumikkut ineqarfinniit qaninnerpaamik én kilometerisut ungasitsigisumiit taamaallaat igittoqaqqusaavoq. Appammi akornguserneqannginnissaat qulakkiissagaanni, killiliussaq minnerpaamik fem kilometeriusariaqartoq, misissuinerup takutippaa.

Imaatigut angallattut akornusiisarnerannik uuttuisimasoq

Ilisimatusartup misissuinermini allami, immap iluani nipiliornerit uuttortarsimavai, tassani imaatigut angallattut nipiliornersa appat ineqarfiinut assigiinngitsunut qanoq sunniuteqartarnerat paasiniarlugu.

Aili Lage Labansenip tassani misissuinermini paasisimavaa, appat ineqarfii angallaffiunerpaamiittut ikiliartortut, allalli ineqarfiit avinngarussimasumiinnerusut amerliartortut.

- Umiarsuit umiatsiallu angallannerisa timmissanut imarmiunut akorngusersuisarnerat erseqqissumik saqqummiunneqarsimanngilaq, misissuinerullu matuma takutippaa, ajornartorsiut paasisaqarfigissagaanni akustikiusumik nakkutiginninneq atorluarneqarsinnaasoq, Aili Lage Labansen allappoq.

Pisortaq: Neriuutigaara ilisimatusartup allat kajuminnerulersissagai

Pinngortitaleriffimmi pisortap neriuutigaa, ilisimatusartup inuusuttut Kalaallit Nunaanniittut kajuminnerulersissagai:

- Pinngortitaleriffimmut ulloq pingaaruteqaqaaq, neriuutigaaralu Aili Lage Labansen-ip maligassiuinermini Kalaallit Nunaanni inuusuttut amerlanerit pinngortitamut tunngasutigut ilisimatusarnermut tunngasunik ilinniagaqarnissaannut kajuminnerulersissagai, pisortaq Klaus Nygaard oqarpoq.

Aili Lage Labansen-ip ilisimatusartartutut ilinniarnera Pinngortitaleriffiup piginnaanngorsaalluni pilersaarutaanut ilaavoq, qallunaallu nunaanni issittumi ilisimatusarnermut atugassanik aningaasalersorneqarluni. Aili Lage Labansen-ip Pinngortitaleriffimmut tunngasutigut Ilisimatusarlutik ilisimatuussutsikkut allaaserisaqarsimasut 21-issaraat.