APP-ip nutaap takornariat Kujataa pillugu paasissutissittassavai
Kujataani nunarsuarmiunut kingornutassiaqarfik app aqqutigalugu takuneqarsinnaanngorpoq, takornariat qallunaatsiaat nunaateqarsimanerat ullumikkullu nutaaliaasumik nunaateqarneq app aqqutigalugu paasisaqarfigisinnaanngorpaat.
Kujataani takornariat kingornutassiaqarfik annertunerusumik paasisaqarfiginiarlugu nunaminertat pillugit paasissutissanik, assinik nunallu assinginik oqarasuaatiminni app aqqutigalugu aallersinnaanngussapput.
Kujataa UNESCO-p 2017-imi nunarsuarmiunut kingornutassianngortippaa, maannalu nunaminertani pingaarutilinni tallimaasuni paasissutissat kiisalu nunatta kujataani nunaateqarneq pillugu tunngaviusumik paasissutissat iphone-kkut Ipad-ikkulluunniit aaneqarsinnaanngorput. Kommuni Kujalleq nittartakkamini taamatut allappoq.
Kingornutassiaqarfik piffissani assigiinngitsuni marlunni nunaateqarnermut tunngassuteqarpoq: qallunaatsiaat nunaateqarnerat aamma nunaateqarneq nutaaliaasoq.
Nassuiaateqartartussat marluk atorfinitsinneqarsimasut
App aqqutigalugu takornariat sumiiffinnik takornariakkaminnik paasisaqarluarnerusalissapput. Suliassamut atatillugu Qassiarsummi Igalikumilu kingornutassaqarfinnik nassuiaasartussat marluk atorfinitsinneqarsimapput, taakkulu kingornutassiaqarfiit oqaluttuassartaat pissanganartut annertuullu oqaluttuarinissaannik ilinniagaqarsimapput.
Nunarsuarmiunut kingornutassiaqarfinngortitsereernerup kingorna nunaminertat taakku tallimat tikikkuminarsarniarlugit suliniutit ingerlanneqarsimapput, kiisalu nunaateqarneq pillugu paasissutissanik katersisoqarsimalluni qitiusumillu paasissutissiisarfiit pilersinneqarsimallutik, taamaalillutik takornariat nunaminertat pillugit paasissutissat itisilersinnaaniassammatikkit.
Amerikamiut misissuisarfiata World Ocean Observatoryp aamma KUJATAA-ta, Visual Solutions Lab peqatigalugu ukiup aappaa avillugu ingerlareersoq paasissutissat, assit nunallu assingi APP-imut ikkussorsimavaat. Piffissap ingerlanerani Nunatta Katersugaasiviata paasissutissat tutsuiginartuunissaat qulakkeerinneqataaffigisimavaa.