App coronamik tunillatsissinnaanermut akiuiniarnermut iluaqutaassasoq

Oqartussat angalasunut maanna inassutigaat, app-i Smittestop mobiliminnut ilannguteqqullugu. Coronavirusip Kalaallit Nunaanni siaruaatinnginnissaanut iluaqutaasinnaammat, Nunatsinni Nakorsaaneq naliliivoq.

Kalaallit Nunaanni coronap tuniluussinnaanera pinngitsoortinniarlugu suliniut alla maanna saqqummiunneqarpoq. Tamatumuuna digital aqqutigalugu suliniutaalluni.

Kalaallit Nunaanni Politiit Nunatsinni Nakorsaaneqarfik Issittumilu Sakkutooqarfik peqatigalugit inassutigaat, Danmarkimi peqqinnissatigut oqartussat pisortatigoortumik COVID-19-app-it, Smittestop, innuttaasut Danmarkimut angalassagunik mobiliminnut ilanngutissagaat.

App-i aqqutigalugu sumiissimaneq nakkutigineqarsinnaavoq. Tassa app-i aqqutigalugu Danmarkimi inuup coronavirusimik tunillatsissimasup eqqaaniissimagaanni paasissutissinneqarsinnaassaaq.

Saaffiginnittoqartarneratigut eqqumaffigineqalersimasoq

Nunatsinni Nakorsaanerup Henrik L. Hansenip Sermitsiaq.AG-mut nassuiaatigaa, innuttaasut arlallit Danmarkimiinnerminni app-i mobiliminnut ikkuttarsimallukku saaffiginnissutigisarmassuk inassuteqaateqartoqartoq:

- Nunatsinnut uteraangamik Danmarkimi inuup tunillatsissimasup eqqaaniissimallutik app-ikkut paasitinneqartarsimapput. Taakkulu saaffiginnikkaangata qanoq ilioriaqqinnissaannik ilitsersuuttarpavut, Henrik L. Hansen oqarpoq.

Innuttaasut Danmarkimiinnerminni inuup tunillatsissimasup eqqaaniissimasut mattussimanissaannik inattarpagut, nunattalu nakorsaanianit ilitsersorneqarnissaat anguniarlugu coronamut atatillugu oqarasuaammut sianeqquneqartarput.

Inuit 1.200-t sapaatip akunneranut tikittartut

- Assersuutigalugu innuttaasoq pissutsit apeqqutaatillugit misissugassamik tigusiffigineqaqqissinnaavoq. Aaqqiissutissaararpassuit ilaat tamanna aqqutigalugu, Kalaallit Nunaanni tuniluuttoqalinnginnissaa anguneqarsinnaavoq, Henrik L. Hansen oqarpoq, nangillunilu:

- Maannakkorpiaq inuit 1.200-t missaanniittut sapaatip akunneranut Danmarkimiit tikittarput. Tikittartut ilaqarsinnaapput tunillatsissimasumik, virusimillu nunamut maanga eqqussisumik. Tassani inuit namminneq tamatumannga paasisaqarsinnaapput, taamalu pisariaqartinneqartumik namminneq iliuuseqarsinnaallutik.

Nunatsinni Nakorsaanerup ilisimatitsissutigaa, app-ip Smittestopip Kalaallit Nunaanni atorsinnaanngornissaa pillugu oqartussat Danmarkimi oqartussanik oqaloqateqartut, tassa Kalaallit Nunaanni tunillatsittoqarsimassappat tamatuma nalunaarsorneqarnissaa siunertaralugu.

Pissutsilli ilaat qujaajaaffigineqartariaqarput. App-imi piffissap ilaani Kalaallit Nunaanni atorneqarsinnaanngussappat, teknikkikkut unammilligassaqarpoq aamma paasissutissat illersugaanerat ilaatigut pillugu inatsit malinneqartussammat.

App-i smittestop.dk aqqutigalugu aaneqarsinnaavoq.

Powered by Labrador CMS