Apersuisimaneq: Ikiorsiissutit annaappaatigut
Ikiorsiissutit pisariaqartilluinnarneqarput, namminersorlutik inuussutissarsiutillit arlallit tamanna oqaatigaa. Qujanarpoq imminiiginnarneqannginnatta, arlallit taamatut oqarput
Takornariat nunamit aallakaasut nutaanillu tikittoqassanani, taamaatitsiinnarlutik nalunaaruteqartorpassuit akiligassarpassuillu aamma sulisut aningaasarsiassaat akilerneqartussat.
Takornariartitsisartut coronap ajornartortsiortitsineranit eqqugaanerpaat ilagaat, takorniariartitsisartullu arlallit oqaluttuaraa Naalakkersuisut Danmarkillu ikiorsiissutaat pisariaqartinneqarluinnartut.
Arctic Wildlife Adventure: Ikiorserneqanngikkutta akiliisinnaajunnaassaagut
- Ikiorserneqarsimanngittuugutta suliffeqarfiutiga akiliisinnaajunnaassagaluarpoq. Tamanna qularutissaanngilaq. Taamaalisimasuuppat suut tamaasa tuniniartariaqarsimassagaluarpakka. Ingerlaannarnissarput maanna neriuutigisupilussuuara, Karl Davidsen Arctic Wildlefe Adventuremeersoq oqarpoq.
Ajornartoornermi aningaasartuutaasartut aalajangersimasut matussutissaannik tapiiffigineqarnissamut qinnuteqarsimavoq. Akuerineqarsimanerlunili suli tusagaqanngilaq, akuerineqassallunili neriuutigaa. Aalisartitsilluni tammaarsimaartitsisarfia aasaq naallugu ulikkaaqqaannavittussatut inniminniiffigineqarsimagaluarluni, inniminniisimasut tamangajalluinnarmik taamaatitsiinnarsimapput:
- Ataasiakkaannguit aggersinnaanertik suli upperaat, amerlanerpaalli taamaatitsiinnarsimapput. Kalaallit Nunaanni imatut tuniluuttoqanngimmat qanoq pisoqassanersoq takoqqaalaaqqullugu oqarfigisaraluarpavut. Europali USA-lu sakkortuumik eqqugaaqqapput, tikeraavullu nunanit taakkuanit aggersartuullutik, Karl Davidsen oqarpoq.
Hotel Qaqortoq: Sulisut 20-t angerlartinneqarsimasut
Hotel Qaqortumi Kujataaniittumi pisortap Jim Riisip sulisut 20-t missaanniittut tamakkiisumik aningaasarsiaqartillugit angerlartissimavai:
- Namminersorlutik Oqartussat taamatut inissisimanitsinni nammqatagiinnissarput aalajangersimammassuk nuannaarutigaara. Sulisumma aningaasarsiatigut ikiorserneqarnissaat qinnutigisimavata, maannakkorpiarlu allanik pisariaqartitsinanga. Soorunami maanna pisoq ingerlaannassappat naggataatigut aningaasaataarutissaanga, maannakkulli ajorpallaanngilaq. Jim Riis Oqarpoq.
Taassuma nassuiaatigaa, akiligassanik kinguartitsinissaq pillugu akiligassaqarfigisat suleqatigisartakkallu piaartumik isumaqatigiissuteqarfigisimallugit. Hotel Qaqortormi matuillugu matuneqarsimavoq, maannakkorpiarlu isertitaqanngivilluni.
- Suleqatigiinnissamut piumassuseqarluartoqarpoq. Jim Riis coronavirusimik Namminersorlutik Oqartussat unitsitsiniaallutik iliuuseqarnerannik tamakkiisumik tapersersuisoq, suliffeqarfiutaanut kngunerlutitsigaluartoq, oqarpoq.
Arctic Dream kaaviiaartitassaraluaminik 750.000 koruuninik annaasaqartoq
Tunumi Arctic Dreamimik piginnittup Lars Anker Møllerip aatsaat taamak oqimaatsorsiorsimatigaluni oqaluttuaraa:
- Ukioq 2019 tamakkerlugu inniminnerneqarsimasut amerlaqqataannik januaarip allaqqaataani inniminniiffigineqarsimavugut, tassa aatsaat taamak ukiumi angusagissaartigisussatut isikkoqalerluni. Maannali tamarluinnarmik ajutoortussanngorput, Lars Anker Møller oqarpoq.
Suliffeqarfiup aalajangersimasumik aningaasartuutigisartagaanut sulisullu ataatsip aningaasarsiassaasa mtussutissaannut qinnuteqarsimavoq:
- Imminiiginnarneqannginnerput assut kusanarpoq, Lars Anker Møller oqarpoq, nangillunilu:
- Inuit ilaat aperisarput, soor suliffeqarfiutigut ikiorserneqassanersut. Tassunga atatillugu oqarusuppunga, suliffeqarfiutinga ingerlalluartuuvoq, maanna kaaviaartitassaraluakka 750.000 koruunit annaareerpakka. Tamanna aasap tungaaut ingerlaannassappat, tre millioner koruunit missaannik kaaviaartitsisarfinnut inuppassuarnillu sulisoqartarninnt ajorluinnartumik kinguneqassaaq.