Apersuineq: Mútep politikkikkut angorusutai aajuku
Inuit Ataqatigiit politikkikkut anguniakkaminni pingaaruteqartuni nutarsaassapput, siulittaasutut sassartutuaasoq Múte B. Egede taama nalunaaruteqarpoq. Suliassat pingaarnerit pingasut IA-p nukittorsagassai taassuma tikkuarpai.
Múte B. Egede Kalaallit Nunaanni partiip annerup tulliani, IA-mi, siulittaasunngussaguni, ulluni 100-ni siullerni suliassat pingasut pingaarnertut suliariniarpai: inuussutissarsiorneq, isumaginninneq kultoorilu.
Taakku pillugit ima oqarpoq:
”Inuussutissarsiorneq nukittooq inuiaqatigiinnullu sammisoq pigigutsigu, taava ineriartorneq atugarissaarnerlu pitsaanerulissaaq, suliffiit ataavartut pigilissavagut Kalaallit Nunaallu namminersulivissinnaalissaaq.”
”Isumaginninnerup iluani nutaaliorutta pilersitsiortoruttalu inuiaqatigiit nukittuut imminnut nammassinnaasut pilersissavagut., inuiaqatigiit kikkunnut tamanut Kalaallit Nunaanni periarfissagissaartillugillu siunissami toqqissisimatitsilersinnaallutik.”
”Kultoorip Kalaallit Nunaat tamakkerlugu atatippaa. Nipilersorneq, eqqumiitsuliorneq, filmiliorneq, atuakkiorneq, timersorneq – kultoorilerinermi ataatsimuussuseq misigisarparput, immitsinnut tatiginerulertarpugut, kisimiikkutta inuiaqatigiinniluunniit ataatsimoorutta. Kultoori taamaammat nukittorsassavarput. Kultoori pitsaasuuppat siunissap pitsaasuunera aamma upperilissavarput.”
Sermitsiaq.AG-mi apersorneqarami 31-nik ukiulik siulittaasutut sassartoq, politikkimi anguniakkani ima oqaatigai.
Inuussutissarsiornermi sukarsuit amerlanerusut
- Inuussutissarsiornermi annertunerusumik inerisaasariaqarpugut. Aalisarneq ukiorpassuanngortuni aningaasarsiutitut qitiutipparput, inuussutissarsiutilli allat, takornariaqarnerup aatsitassarsiornerullu saniatigut, aamma pilersittariaqarpagut, Múte B. Egede naqissusiivoq.
Nunami tamarmi piumassuseqarluartoqarmat ineriartortoqarsinnaasoq taanna isumaqarpoq. Sinaakkutilli piareertariaqarput, soorlu angallannerup iluni, inissat meeqqeriveqarfiillu pillugit, aalisartunullu tunitsiviit.
Aaqqiipallannerinnaat atorunnaarlugit
- Angorusutagut angusinnaavagut ilinniartitaaneq aqqutigalugu. Inuusuttut meeqqat atuarfiannit anigaangata aaqqiipallannerinnaq atorunnaartariaqarparput. Meeqqat mikineranni qanoq iliuuseqartariaqarpugut. Taamaasiorutta taava meeqqat atuarfiannit anernerminni ilinniarsinnaanerussapput, Múte B. Egede nassuiaavoq. Taassuma kissaatigaa perorsaasussaaleqineq qaangerumallugu, perorsaasut atugaat pitsanngorsarneqassasut.
Nuna aningaasaqarnikkut imminut napatittoq anguniarlugu allamiunik sulisoqarnerulernissaq taassuma itigartivissinnaanngilaa, taamaaliortoqassappalli Sulisitsisut, SIK-lu peqataatinneqassasut kissaatigalugu. Taakkuummatami “aaqqiissutissanik pitsaasunik nassaarniarnermi qitiulluinnartut”.
Sara Olsvigimit allaassut
Sara Olsvigimit sukkut illit allaaneruit?
- Aqutseriaasera allaaneruvoq. Politikkerput inerisassavarput, ersarinnerusunillu oqariartuuteqartassalluta.
Attaveqarniarneq ersarlussimagami?
- Ima oqarsinnaavugut, oqariartuutigut ersarinnerulersissinnaavagut taamaasilluta pingaartitagut ersarinnerulersillugit.
Demokraatit Siumumit suleqatigerusunneruigit?
- Politikkimi sunniuteqarsinnaaneq pingaarneruvoq. Siusinaartumik partiit kikkulluunniit mattuteriissanngilakka.
Illuatungiliuttuunermi saassussisinnaaneq nukittorsassaviuk imaluunniit naaperiutissanik ujartuisuussavit?
- Isumaqarpunga nammineerlunga naaperiusissarsiortuullunga, taamaasillunga Inatsisartuni kikkulluunniit suleqatigisinnaallugit. Qulartoqassanngilarli IA-p anguniakkatut siunniussai angujumallugit suliaqassagatta.
Partiip iluani isumaqatigiinnginnerit nalaatassat piareersimaffigivigit?
- Tusarnaartarpunga. Tusaaneqarnissannullu nipitunerunissannut piumassuseqarlunga, taamaammat qilanaarpunga. Siulittaasoq sammivimmik ersarissumik tikkuussisinnaasariaqarpoq. Taamaaliornissamut pisariaqartunik iliuuseqassallunga piareersimavunga. Tunuarternikuunngisaannarpunga, tusarnaartarlungali. Aap naaperiusissanik ujartuisuuvunga, siulittaasunngussagumali aamma partiip sammivissaanik inissiinissamut piareersimallunga.
Partiip siulittaasuattut tullissaa kinaassava?
Partii Nuummi katersortarfimmi arfininngornermi decembarip aallaqqaataani immikkut ittumik ataatsimeersuassaaq, tassani siulittaasussamik nutaamik qinersisoqassalluni. Múte B. Egede qinigaassappat siulittaasup tullianik aamma qinersisoqassaaq.
Siulittaasup tulliattut kina piukkuppiuk?
- Tassunga isummernikuunngilanga, siulittaasutut qinigassanngortilluni sassartutuaagallartoq oqarpoq.