Apeqqutit mianernartut aatsaat taama ikitsigisut
Politikerit nalinginnaasumik Naalakkersuisunut paasiniaanissaminnut piffissarujussuaq atortarpaat, atorfilittallu apeqqutit akinissaannut nukimmik suli atuinerusarlutik. 2020-li ukiuuvoq immikkut ittoq. Tassanngaannarmi apersuisoqarunnaarpoq.
Inuiaqatigiit angalasinnaanerlu ukiumi qaangiuttumi kisimik peqqaannagu annikillileriffigineqanngillat.
Politikerit apererusuttarnerujussuat coronap kinguneranik annikilleriarujussuartoq, aviisi AG allappoq.
§-37 najoqqutaralugu apeqqutigineqartut ukiup ingerlanerani taamaallaat 218-iupput, taakkulu ukiut qulit ingerlaneranni aatsaat taama ikitsigalutik, tassa 2014 pisoqarfioqisoq eqqaasanngikkaanni, taamanimi ukiakkut ataatsimiinneq Aleqa Hammondip tunuarneranit ajoquserneqarmat.
Assersuutigalugu Inatsisartunut ilaasortat 2019-imi apeqquteqaatigisaat 2020-mut sanilliullugit apeqqutinik 150-ingajannik amerlanerupput. Naalakkersuisunut ilaasortanut 2018-imi §-37 najoqqutaralugu apeqqutigineqartut aamma 300-t sinneqarput, taakkulu atorfilittat ikiorsiullugit akissuteqarfigineqartussaasarlutik.
Kigutinut narlorsaatit aamma kræftimut pilersaarutit
Apeqquteqarumatuulli ilaat apeqquteqartarnerminik taamaatitsiumanngitsoq tassaavoq Sofia Geisler. Taanna 32-nik apeqquteqarluni siorna amerlanerpaanik apeqquteqaateqarpoq. IA-meersoq eqiasuitsoq taanna tusagassiortutut ilinniarsimagami immaqa suliassanut itisilerinissaminut pikkoriffeqarsimassaaq.
- Siorna apeqquteqaatigisanni – apeqqut suna pitsaanersaava?
– Maluginiarnarnerpaat ilaatigut tassaapput apeqqutit kigutinik narlorsaasarnermut tunngasoq, inuusuttut ingerlariaqqissimanngitsut aamma kræftimut pilersaarutit. Pineqartut taakku inuppassuarnut attuumassuteqarput, Sofia Geisler akivoq.
Aviisimi AG-mi allaaserisaq tamaat atuarsinnaavat: