Apeqqarissaarnermik aatsaat misiliisoq sakkortusaarfigineqartoq

Aqqaluaq B. Egede aamma Múte B. Egede IA-meersut aamma Partii Naleqqameersoq Jens Napaattooq, naalakkersuisup akissuteqaataannik naammagisimaarinninngillat.

Kujataani uranimik piiaasoqarnissaanut suliami, Aqqalu Jerimiassenip qanoq ililluni innuttaasut aarlerinanngitsumik atugaqarnissaat qanoq qulakkeerniarneraa, Aqqaluaq B. Egedep nassuiartikkusuppaa.

Akissut ersarluttoq

IA-mi naalakkersuinermik suliaqartoq ersarinngitsumik akissutisivoq, tassani piffimmi imermik pilersuinerup ulorianartorsiortinneqannginnissaa soorunami qulakkeerneqassasoq oqaatigineqarluni. Akissuteqartullu apeqqut Aatsitassanut Naalakkersuisumut innersuussutigaa, akissussaaffiata avataaniinneranik tunngavilerlugu.

- Suliassaqarfiit ilisimannginnakku tupigusuutigaa. Uran suliniutinut annertuut suliassaqarfiata ataaniippoq, taanna illit akissussaaffeqarfippit ataaniippoq, Aqqaluaq B. Egede oqarpoq.

Aatsitassanut Naalakkersuisuusimasoq Múte B. Egede aamma ilannguttariaqarpoq.

- Inuiaqatigiinnut sunniutissanut akisussaasuuvutit. Assersuutigalugu atortussiat ulorianartut illersorsinnaasumik angallanneqarneranut tunngatillugu. Tamatumunnga Inatsisartunut suliassaqarfiginninnginnerarninni kukkulluinnarlutit oqaaseqarputit, IA-mi politikeri naqissusiivoq.

Tusaatissaq

Aqqalu Jerimiassenip IA-mi politikerit tutsuiginanngitsumik akissuteqarfigai:

- Tamanna tusaatissatut tigusariaqarpara.

Aqqalu Jerimiassenip apeqqarissaarnermi pissusilersorneranut Múte B. Egede narrujuummisorujussuuvoq.

- Illassanerpunga imaluunniit qiassanerpunga. Suliassaqarfimmik taama annertutigisumik aamma pingaaruteqartigisumik, assigiinngitsorpassuartigut attuumassuteqartumik inuussutissarsiornertut ittumik taamaatut naalakkersuisoqarluni toqqissisimananngilaq, Múte B. Egede, apeqqarissaarnerup kingorna Sermitsiaq.AG-mut oqarpoq.

Naalakkersuisut suliassaqarfiisa agguataarneqarnerinut allakkami, qupperneq 23-mi allaqqavoq, Aqqalu Jerimiassenip ilaatigut uku akisussaaffigigai:

• Suliniutinut annertuunut tunngaviatigut atugassarititaasut.
• Aatsitassanut suliffissuaqarnermullu tunngatillugu inuiaqatigiinni nammaqatigiissumik ingerlatsinissamik qulakkeerinninnissaq.
• Atomip nukinganik atortussianik nunanut allanut nioqquteqartarnermi isumannaallisaanermut tunngatillugu nunat tamalaat isumaqatigiissutaat.

Avoqqaarinninneq

Inatsisartunut siulittaasup Vivian Motzfeldtip aamma Jens Napaattooq avoqqaarisariaqarsimavaa, oqaatsinillu kusanarnerusunik atueqqullugu.

Aqqalu Jerimiassenip ilanngussamini takornariaqarnikkut suliniutigineqartut kisiinnangajaasa oqaluuserimmagit, Partii Naleqqami naalakkersuinermik suliaqartup pakatsissutigaa. Inuussutissarsiorfippassuit allat naalakkersuisup pilersaarutaani ilaasariaqaraluartut, tassani nunatsinni najugaqartut kissaataannik aallaaveqarnissaat pingaarnertut oqariartuutigineqarluni.