Apeqqarissaarnermi nunaqarfiit qitiutinneqartut

Nunaqarfinni peqqinnissaqarfinni sulisut, nunaqarfinni atugassarititaasut, nunaqarfimmiut ernisussiortunut pitsaanerusumik attaveqarnissaat allallu, apeqqarissaarnermi qitiulluinnartutut apeqqutigineqarput.

Peqqissutsimut Naalakkersuisoq, Anna Wangenheim, Inatsisartunit ullaaq manna apeqqarissaarfigineqarpoq.

Coronap tunillaassornera pillugu apeqqutit amerlanngillat, nunaqarfinnili peqqinnissaqarfiup neqeroorutigisinnaasai qitiulluinnarput.

- Nunaqarfinni sulisoqarnikkut Naalakkersuisut qanoq qulakkeeriniarpat?

- Peqqinnissaqarfimmi sulisut amigaatigineqartut sulilersikkumallugit, aningaasat paarlatsinut atorneqartut, atorfillit akissarsiaannut qaffaatitut atornissaannut Naalakkersuisut eqqarsaatersuuteqarpat?

- Naartusut nunaqarfinni najugaqartut ernisussiortumit malinaavigineqarnerulernissaannut qanoq iliuuseqartoqarniarpa?

Nunaqarfiit isorliunerusullu peqqinnissaqarfiinut tunngasut apeqqutit, Peqqissutsimut Naalakkersuisup, Anna Wangenheimip apeqqarissaarfigineqarami akisassaasa ilagaat.

Tele atorlugu attaveqaqatigiinneq

Naalakkersuisup erseqqissarpaa peqqinnissaq pillugu ataatsimiititaliarsuaq maanna sulisoq innersuussutinik suliaqartoq, taamatullu peqqinnissaqarfiup innuttaasunut neqeroorutasa pitsaanerulernissaanut innersuussutit, Naalakkersuisut utaqqimaaraat.

- Pitsaanerpaamik neqerooruteqarnissaq Naalakkersuisut soqutigisaraat, Anna Wangenheim oqarpoq.

Ernisussiortulli naartusunut attaveqartarnerisa pitsaanerulernissaannut periarfissat Naalakkersuisunit misissorneqartut, Naalakkersuisup oqariartuutigai.

- Internetikkut attaveqartarneq annertunerusumik atorsinnaavarput. Soorlu naartusoq ernisussiortumit oqaloqatigineqarsinnaavoq, ernisussiortoq sumiiffimmiinngikkaluartorluunniit. Tassa internetikkut attaveqarneq atorlugu inooriaaseq, erninissaq naartusullu oqaloqatigiissutigerusutai allat, eqqartorneqarsinnaapput, Anna Wangenheim oqarpoq.

Ilanngullugu erseqqissarpaa nunatsinni naartuersittarneq pillugu inatsit 1975-mi atulermalli periutsit Naalakkersuisunit maanna misissuiffigineqartut. Taakkunanilu allannguutissaqartoqarsinnaasoq, kissaatiginngisamik naartulertarneq pinngitsoortikkumallugu suliniutissanik.

Coronap kinguneri

Inatsisartuni ilaasortat ilaat COVID-19-ip tunillaassornera peqqinnissaqarfimmut qanoq kinguneqarnersoq paasiumavaat.

Peqqissutsimut naalakkersuisoq nassuiaavoq nakorsat immikkut ilisimasallit aggersaasarnerat upernaaq annikillilerneqarsimasoq. Maannali aggersaasarnerit nalinginnaasumik ingerlaqqilersimapput. Pinartutulli aggersaanerit nikisinneqarsimanngillat.

- Killilersuutit maanna atuuttut naammattutut nalilerneqarput. Pissutsit ullut tamaasa nalilersorpagut, nutaanillu nalunaarusiortoqassagaluarpat innuttaasunut tamanna ersarissumik nalunaarutigineqarumaarpoq. Tunillaassortoqannginnissaanulli tunngatillugu innuttaasut tamarmik akisussaaqataapput, Anna Wangenheimip erseqqissarpaa.

Anna Wangenheimip ilanngullugu tikkuarpaa Naalakkersuisut suliniutaat, soorlu kræfti pillugu periusissiatut suliaq, coronavirus pissutigalugu sillimaniarnermut oqartussat ukkassineranni, kinguaattoorsimasut.

Powered by Labrador CMS